Latgolys Radejis zinis (10.11.2008.)
![](https://lpr.gov.lv/wp-content/uploads/2005/dezuratteli/79.jpg)
Jākubpiļs Golvonajā bibliotekys Bārnu literaturys nūdaļā akcejis „Latvejai 90” laikā nu 10. leidz 15. novembram nūtiks vairuoki pasuokumi, kas veļteiti vaļsts dzimšonys dīnai. Pyrmsškolys izgleiteibys īstuodē „Zvaniņš” 14. novembrī nūtiks informativi izklaidejūšā viktorina “Pi zynuotkuoruo Spreideiša”, bet konkurss školānim par Latvejis viesturi paradzāts, akcejis izskaņā – ituo goda 20. novembrī, pulkst. 16.00.
Nu 2009.goda 1.janvara SIA “Leivuonu dzeivūkļu i komunaluo saimnīceiba” planoj palelynuot iudiņsapguodis pakolpuojumu i kanalizacejis pakolpuojumu tarifu, – tai līcynoj inpormaceja Leivuonu nūvoda pošvaļdeibys sātyslopā. Tarifu projekta apstyprynuošonys gadīnī par iudiņsapguodis pakolpuojumu īdzeivuotuojim i juridiskom personom byus juomoksoj 0,293 lati par vīnu kubikmetru, bet par kanalizacejis pakolpuojumu – 0,643 lati par vīnu kubikmetru.
Nu šudinis leidz 21.novembram Latgolys Kulturviesturis muzejā 6.-12.klašu školāni varies apmekleit muzejpedagogiskū programmu “Latvīšu breiveibys ceinis”. Nūdarbeibys laikā školāni varies padzilinuot zynuošonys viesturē par Latvejis vaļsts dybynuošonu i latvīšu breiveibys ceiņom, kai ari tiks īsaisteiti diskusejuos i dorba grupuos, izspielies pruota spieli “Mozgls”, īsapazeis ar Latvejis vaļsts simbolim i.t.t. .Nūdarbeibys nūtiks Latgolys Kulturviesturis muzeja centraluos ākys lektoreja zalā.
Luočplieša dīnys pasuokumūs Preiļu nūvodā AS “Preiļu sīrs” vaļdis prīšksādātuojam Jāzepam Šņepstam i Tilžys Rūmys katuoļu draudzis bazneicys prīsteram Albertam Budžem tiks pasnīgtys Latvejis vaļsts aizsardzeibys fonda “Luočpliess” gūda zeimis. Šudiņ plkst.16.00 Preiļu Viesturis i lītišķuos muokslys muzeja ekspoziceju zalā nūtiks Luočplieša dīnai veļteits pasuokums. Pkst.17 Preiļu Kulturys nomā nūtiks Preiļu 2.vydsškolys reikuotais Luočplieša dīnai veļteits sareikuojums “Lai leigoj lapna dzīsme Tev, breivā Latvejā!”.
Rēzeknis Augstškolā 13.novembrī nūtiks Studentu dīnai i Latvejis Republikys 90.godadīnai veļteits pasuokums. Plkst. 18.00 Atbreivuošonys alejā 90 aktu zalā – svineiguo daļa. Tiks sumynuoti studenti, kuri paruodiejušs sevi kai aktīvus pasuokumu organizatorus i daleibnīkus, rodūšus zynuotniskajā dorbā i uzcīteigus studejuos, kai ari sportā. Plkst. 19.30 Atbreivuošonys alejā 90 aktu zalā nūtiks „Popīla”. Tuos tēma : „Latvīšu zalta kino”. Vokora izskaņā RA Sporta nomā byus bals, spielies grupa „Nakts ekspresis”.
Nu šudinis leidz 16.novembram Daugavpiļs bibliotekā nūtiks Zīmeļvaļstu biblioteku nedelis pasuokumi. Šudiņ plkst.12.30 Latgolys Centralajā bibliotekā nūtiks literars pasuokums i izstuode “Īpazeisim Zvīdreju literaturā i Norvegeju ceļuojumu īspaidūs”, kurā kluotasūšī varies īpasazeit ar Zīmeļvaļstu literaturys pierlem, nūzaklauseit Daugavpiļs universitatis pasnīdzieju prīkšlasejumus, kai ari īpasazeit ar literaturys kluostu, kū pīduovoj biblioteka. Pasuokumā eipaši teik gaideiti školu jaunīši i studenti.