Latgolys Radejis zinis (1.04.2008.)
Leivuonu nūvoda dūme apstyprynuojuse nūmys moksu sakņu duorzu lītuotojim, kas nu šudinis byus aptuveni diveji lati par 600 kvadratmetrim izmantotuos zemis. Nūmys moksa sakņu duorzu lītotuojim ar 2008.goda 1.apreli nūscāta 1,5% apmārā nu apbyuātuo zemisgobola vierteibys privatizacejis vajadzeibom godā. Īprīšk nūsacātuo nūmys moksa beja seši lati par 600 vadratmetrim zemis.Šudiņ Preiļūs stuojās spākā jaunī iudiņsapguodis i kanalizacejis pakolpuojumu tarifi. Turpmuok Daugavpiļs regionaluo Sabiedriskuo pakolpuojumu regulatora padūmis apstyprynuotais SIA “Preiļu saimnieks” iudiņsapguodis pakolpuojumu tarifs byus 0,44 lati par kubikmetru (bez PVN), īprīškejo 0,37 lati par kubikmetru vītā. Sovukuort kanalizacejis pakolpuojumu tarifs turpmuok pīaugs da 0,36 (bez PVN) latim par kubikmetru. Da šam kanalizacejis pakolpuojumu tarifs beja 0,30 lati par kubikmetru.
Paguojušouos nedelis nūgalē, 28. martā, kravys automašynu i autobusu tierguotuojs “Scania Latvia” Daugavpilī atviere leluokū kravys auto servisa centru Latgolā. Servisa centra atvieršona Daugavpilī veicynuos kravys auto puorvoduojumu nūzaris izaugsmi Latgolā. “Scania” servisa centra celtnīceibā tyka ieguldeiti divi miljoni eiro (1,4 miljoni latu). “Scania” servisa centrā Daugavpilī atvārts vuiceibu zals, kas ļaus vuicēt jaunūs autobrauciejus drūšai i ekonomiskai braukšonai, telpa paredzāta ari mehānikim, kur jī var apgiut jaunuokuos tehnologijas ikdīnas dorbam. Servisa centrs ir apreikuots ari ar atpyutys telpu.
Pārnajā naktī guņgrāka dieļ Daugavpilī evakuāti 23 cilvāki. Izsaukumu iz guņsgrēku VUGD sajieme plkst.00:08. Daga kaidys dzeivojamuos ākys pogrobs. Gluobieji evakueja sātys īdzeivotojus. Veseleibys puorbaudei slimineicā nūguoduots četrus godus vacs bārns, kurš, īspiejams, varātu byut sasaindejs ar dyumim.
