Latgolys Radejai 2 godi!!!

Sovu ūtrū dzimšonys dīnu 9. junī atzeimeis Latgolys radeja, iz kuru poši radejis darbinīki soka taipoš kai radejis DJ Daiņs Platacs džinglā: „Zinuotnīki ir atkluojuši, ka lobuokais kū Dīvs radeja ir Latgolys Radeja!”

Leidza ar Latgolys Radejis raideišonys suokšonu 2006. goda 9.junī Latvejis austrumu dalī sūpluok vītejom i vaļsts mārūga radejis stacejom pasaruodeja ari jauna regionala leimeņa radejis staceja. Latgolys Radejis raideituoji atsarūn Rēzeknē 103 FM, Daugovpilī 95,2 FM i Jākubpilī 95,8 FM frekvencēs, bet tei ir dzieržoma nu Aizkrauklis leidz Ludzai i pošai Latvejis dīnvidu gola pīrūbežai Daugovpiļs i Kruoslovys rajonūs. Kai duovona klauseituojim paradzāts, ka itūvosor beidzūt tik izsuokta ilgi gaideituo apraide nu Bolvu pusis, kab Latgolys Radeja byutu dziežoma vysā Latgolys regionā.

Itūgod dzimšonys dīna natiks atzeimuota ar lelim svātkim, bet, pasasokūt Rēzeknis piļsātys atsauceibai, 29. julī vysus radejis klauseituojus aicynom sasatikt kluotīnē Latgolys Radejis muzykys daņču naktī “Eiropas Tautu festivāla” laikā, kur uzastuos taidys grupys kai “Likteneigais Pagrīzīns iz Vainovu”, “Bez PVN” , “Borowa MC” i pasuocīni vadeis radejis DJ – „Raibais Suņs”, Ainārs un Tenis. Zam paguojušuo goda beigu pasasokūt “Latgolys Producentu Grupai” veiksmeigai tika izdūta “Latgolys Radejis dzīšmu izlase # 1” i iz prīšku paradzātys leidzeigys aktivitatis!

Prīcojamīs, ka itūs div godu laikā asam spiejušs sevi paruodeit kai uzticamu i klauseituoju meiļuotu radejis staceji, kas kasdīnys programā lelu viereibu pīvierš eipaši vītejim ļauds, nūtykumim, muzykai, nu naaizmierst ari par pasauļa aktualitatem. Veiksmeiga izaveiduojus ari sadarbeiba ar pašvaldeibom.

Iz prīšku piļneiguošonuos i attīsteiba saistoma tik ar lobom puormaiņom bez jau īprīšk sauktom – ar juli Latgolys Radejis programa byus dzieržoma vysu dīnnakti, paradzāti izlobuojumi radejis sātys lopā www.lr.lv i cytys dažaidys aktivitatis i piļneiguojumi klauseituoju prīcai.

Dzimšonys dīnys nūskaņuos sokom lelu PAĻDIS sovim klauseituojim i aicynom ari iz prīšku byut kūpā i klauseitīs “Sovu radeju”!