Latgolys jaunīši – Latgolys nuokūtne!

“Latgalīšu Gazeta” kai pīlykums laikrokstā “Latgales Laiks” pasaruodejs jau ūtru reizi. Pīduovoj: bīdreiba „Latgolys Studentu centrs” – ituo pīlykuma materiali teik publicāti ari portalā www.lakuga.lv

Vīna nu myusu dīnu aktualuokajom regionu atteisteibys problemom ir jaunīšu aizplyusšona iz lelajom piļsātom, eipaši Reigu, i naatsagrīzšona sovā nūvodā. Kai ir ar Latgolys jaunīšim? Deļkuo studeju vītys izvēle ir par lobu Reigai, voi ir dūmys par atsagrīzšonu? Kai ari nu tuoluma var pīsadaleit Latgolys nuokūtnis veiduošonā? Iz itūs vaicuojumu atbiļdēja Latgolā pazeistami jaunīši.

Koč ari itūšaļt Aigaru Runči (grupa „Borowa Mc”, Radio SWH dīdžejs), Zigmundu Čeksi i Alvi Bernānu (grupa „Green Novice”), Kristapu Rasimu (grupa „Bez PVN”, LTV7 raidiejuma „Zootrops” vadeituojs) i Vitu Brišku (Latgolys Studentu centra koordinatore Reigā) studejis ir aizvadušys iz Reigys augstškolom, Latgolu jī vysleidza sauc par sovu sātu – tī, kur jī poši sasajiut labi i kur dzeivoj jūs saimis.

Izvēle par studejom Reigā ir vysaidu apstuokļu radeita, tok vīns nu golvonūs īmesļu – lai kai i grybātu, tok Latgolys augstškoluos nav taidu studeju programmu, kurys jī ir izavielejuši apgiut. Ite navar studēt par aktīri, par storptautiskūs attīceibu, geograpejis, biomedicinys i nanotehnologeju voi cytaidu specialistu. Bez tuo Reigā, piec jaunīšu īskota, ir vaira īspieju sevi nūdrūšynuot ari paraleli studejom, kas na vysod īspiejams Latgolā.

Tūmār gryušuokuo ituos problemys daļa ir atsagrīzšona atpakaļ sovā pusē piec studeju. Latgolys jaunīši, apdūmojūt īspiejis atsagrīzt, par golvonim prīšknūsacejumim sauc: dorba vīta atbylstūši izgleiteibai, pīteikams atolguojums i izaugsmis īspiejis, kū na vysod var atrast. Svareigs īmeslis ir ari saime, saknis, dzeivis apstuokli, koč tymā pošā laikā tys zeimuotu atsasaceišonu nu lelpiļsātys pīduovuotūs ierteibu.

Nu ūtrys pusis, „atsagrīzšonai” na vysod juobyut fiziskai. Kristaps Rasims tai i soka: „Kai es varu atsagrīzt Latgolā, ka nu juos eisti naasu aizbraucs prūm! Nui, fiziski es daudz asu Reigā, a morali…”

Jaunīši ir puorlīcynuoti – ari nadzeivojūt Latgolā, sevkurs jaunīts var pīsadaleit juos nuokūtnis atteisteibā. Kai vīnkuorši nasakaunejūt par tū, ka ir latgalīts, tai saglobojūt dzeivys vysaidys latgalīšu tradicejis i uorpus Latgolys, tai ari aktivi pīduovojūt sovys idejis, aicynojūt cylvākus dareit i struoduot Latgolys lobā.

Aigars Runčis soka tai: „Myusudīnuos tys ir vysā vīnkuorši – vīgli var komunicēt ari ar telepona voi interneta starpnīceibu”. Zigmunds Čeksis otkon ir puorlīcynuots, ka vystik „svareiguokī dorbi juodora sātā, juosuoc ar sevi i ar sovu sātu”.
Studentim vīns gon ir skaidrs – golvonais paturēt pruotā: “Esi latgalīts nu reita, pušdīnēs i vokorā!” Tod i sevkurs ar kotru vuordu i dorbu paleidzeis Latgolys nuokūtnei!

Kai pozitivs pīmārs tam, ka piec studeju Reigā var atrast sovu vītu i Latgolā, nūsaucams grupys „Bez PVN” daleibnīks, „Latgolys Radejis” dīdžejs Guntis Rasims. Jis ir pyrmais, kas sovā laikā televizejā, pīsadolūt realitatis šovā „Fabrikys muzykalais teatris”, daudzus jaunīšus īdvasmuoja nasakautreit par sovu latgalīša byuteibu.

Guntis ir studiejs Biznesa augstškolā „Tureiba” sabīriskuos attīceibys, niu jis ir sataisiejs bīdreibu „Latgolys Producentu Grupu”, kura spielej lelu nūzeimi taišni myusudīnu latgalīšu muzykys atteisteibā. Ir izdūts grupys „Bez PVN” debejis albums, pyrmuo latgalīšu muzykys izlase, niu nūteik dorbs kai pi vairuoku muzykalu pasuokumu realizeišonys, tai ari grupys „Dabasu Durovys” debejis albuma izdūšonys Guntis pats soka, ka jam ir bejuši vairuoki īmesli, kab atsagrīztu, i jis tuo nav nūžāluojs. Jis ir puorlīcynuots, ka gareigā ziņā dzeivuot Latgolā ir daudz vīgļok, a Reiga nimoz nav tik tuoli. Runojūt par tū, kai jaunīši uorpus Latgolys var pīsadaleit nūvoda atteisteibā, Guntis nasašauba: „Tam, kur cylvāks dzeivoj ci atsarūn, nav izškirūšys nūzeimis. Ka Latgola jam ir svareiga, jis taipat koč kū dareis juos lobā. Kotrs var izapaust sovā veidā i vītā. Golvonais, ka palīk cylvāks.”

Bīdreiba “Latgolys Studentu centrs” ar Eipašūs aizdavumu ministrejis Sabīdreibys integracejis lītuos sekretariata atbolstu realizej projektu „Latgolys jaunīši – Latgolys nuokūtne”. Ituo projekta ītvorā ituo goda 22. junī 19 stuņdēs vokorā vysi interesenti tyka aicynuoti iz Bukmuižu (Ezernīku pogosts, Kruoslovys rajons), kur pasuokumā „Latgalīts latgalīšam draugs” varē puorsalīcynuot par Latgolys muzykalūs jaunīšu nu grupu „Bez PVN”, „Dabasu Durovys”, „Likteneigais pagrīzīņs iz Vainovu”, „Green Novice” i jaunūs literatu spiejom i talantu nest latgaliskū vuordu.