Latgalīšu rokstu volūdys kursi Reigā
![](https://lpr.gov.lv/wp-content/uploads/2007/lgsc-q3o7/1263.jpg)
Bīdreiba “Latgolys Studentu centrs” sadarbeibā ar Latvejis Nacionalū biblioteku reikoj latgalīšu rokstu volūdys kursus, kas nūtiks Reigā, Krišjuoņa Barona īlā 14, nu ituo goda 28. oktobra leidz 16. decembram.
Kursu laikā byus praktiskuos nūdarbeibys, kuru laikā jūs daleibnīki tiks īpazeistynuoti ar myusudīnu latgalīšu ortografeju, varēs īsavuiceit skaiteit i raksteit latgaliski. Paradzātys ari lekcejis par myusudīnu latgalīšu ortografeju i latgalīšu rakstu volūdys vēsturi.
28. oktobrī 18:00 stuņdēs nūtiks LR Tīslītu ministrejis Vaļsts volūdys centra Latvīšu volūdys ekspertu komisejis Latgalīšu ortografejis apakškomisejis prīšksādātuojis Dr. philol. Annys Stafeckys lekceja par myusudīnu latgalīšu ortografeju, ortografejis komisejis padareitū i par jaunajim ortografejis nūsacejumim.
Latgalīšu ortografejis komiseja struoduoja nu 2003. goda i izstruoduoja vīnuotys latgalīšu rokstu volūdys normys, kas apvīnoj vaira kai 250 godu laikā izkūptū latgalīšu rokstu tradiceju, Pītera Stroda vadeituos ortografejis komisejis 1929. godā pījimtuos raksteibys normys i myusudīnu volūdnīku pietiejumūs giutuos atzinis.
Myusudīnu latgalīšu rokstu volūdys ortografeja ir apstyprynuota vaira kai pyrms goda, 2007. goda septembrī. Sabīdreiba ar jū tyka īpazeistynuota plašuok 2008. goda majā Rēzeknis piļsātys dūmē organizeitajā informativajā seminarā, iz kū beja īsarads daudz interesentu i kas radēja diskuseju, kai ituos volūdys normys var tikt īvīstys dzeivē i kaids ir latgalīšu rokstu volūdys lītuojuma areals.
2008. goda majā latgalīšu rokstu volūdys nūsacejumi ar Latgolys planuošonys regiona atbolstu tyka izdūti brošurys veidā. Junī LgSC jūs nūsyutēja Latgolys vydsškolom, aicynojūt absolventus īguoduot sovys saknis i volūdu ari piec školys veikšonys i aizīšonys pasaulī, a augustā – Latgolys pamatškolom, aicynojūt škoļnīkus īgiut zynuošonys par sova nūvoda kulturviesturi i giut prīcu i lapnumu par pīdereibu Latgolai.
Latgalīšu rokstu volūdys kursi ir par veļti.
Vītu nav cīši daudz, deļtuo interesentus aicynojam nu suoku pīsasaceit iz e-postu lgsc@inbox.lv, pasokūt sovu latgalīšu rokstu volūdys prasmi.
Latgalīšu rokstu volūdys kursi plašuokai Reigys sabīdreibai, ite dzeivojūšim latgalīšim i studejūšim Latgolys jaunīšim ļaus īsapazeit ar latgalīšu rokstu volūdys ortografeju, īsavuiceit skaiteit i raksteit latgaliski.
Kursi veicynuos leluoku latgalīšu rokstu volūdys lītuojumu sabīdreibā i latgalīšu rokstu volūdys, literaturys i kulturys sasaglobuošonu i atteisteibu.
Informaceju sagatavēja Ilze Sperga,
LgSC vaļdis prīšksādātuoja