Kai mozi bārni

Vys tik verūs iz ļaužu i breinojūs – ruodīs, taidi i lobi, i pruoteigi cylvāki. Šaļtim i pasmaida, šaļtim sasarunoj sovā storpā. Taidi kai izgleituoti, veikuši školys i kursus, runoj nazcik svešvolūduos. Tok i dorbs ir, i vys kaidu nabejs olgu moksoj, i jumts viers golvys. Sovā storpā iz īlys i dorbā, dūmuot, nasalomoj.

No kai teik pi sovu datoru i škārsteiklā, vem dzeivu žuļti. Tok ak jau tī poši, kas veikalā, iz īlys i transportā smaida voi verās nakurīnē i, izmynuši iz kuojis, nu suoku pasoka “oi”, a piec tam “atvainojiet”.
Verīs kuru rokstu na gribi, zam juo komentarūs vīni žuļts vamakli. Vyss ir švaki.

Es jau nasoku, ka ir labi. Pasaver iz cenu veikalā, až kai uorzemēs i vēļ trokuok. Da i rudiņs īt viersā, vosora cauri, atvalinuojums pagaiss kai nabejs. Suoksīs apkuris sezona. Benzins duorgs, pa teļvīzeri ruoda vīnus syudus – a grīz kuru kanalu gribi. Referendumi izaguož, vysi rodi uorzemēs, vysi deputati zūg. Draugūs ari nivīns naroksta i nakomentej biļdis nu pādejuos tusovkys. Eisi sokūt – nav nikaidys dzeivis.

Mož deļtuo i iz īlys i veikalā lobi cylvāki, ka žuļti izvem škārsteikla komentarūs.

Vaira jau i nazyni kuo raksteit. Anonimī rīs par vysu.
Cuoli izaškāluši? Glupuosts, na ziņa. Sieņs aug mežā? Pa tū laiku vaļsti izzūg, a jei roksta par nazkaidom sienim. Latgalīšu pareizraksteiba? A kai grybu, tai rokstu – i vyspuor asu nu zylūs azaru zemis. Redzieju nazkū voi nazkū īsavieru? Da kū jei bļuznej, vyss pasauļs tuo pylns.
Da i vyspuor – es, es, es. Da i vyspuor – vyss ir švaki.

Vys tik dūmoju. Voi ta myusim niu īt gryušuok kai myusu mamom, kas pušdīnis laikā skrēja pa veikalim, a tī tikai margarins i saļdeitī ananasi, voi babom, kas plēsēs pa kolhozu i sajēme kapeikys voi stuovēja ryndā piec maizis nu 4 stuņžu reitā nuotonā suknē. Voi ta myusim kaids kars voi revoļuceja, bādys voi nalaimis, zemistreicis voi halerys epidemeja.
Siežam anonimi vysi pi sovu datoreišu i bokstom tastaturu. Ni viejs pyuš, ni leits iz golvys.
A vot laimis nazkai īsavērt navarim. Laimi natiergoj eBay, juos nav 17” monitorā. Tī tei bāda, ka pošam juostruodoj, kab byutu laimeigs.

Sauc tū par dvēselis higienu voi dvēselis reitarūsmi. Pasaver apleik i pasmaidi.

Nu, kas ta ir tik švaks nūtics? Bārns nūmyra? Tev nūjēme obejis kuojis? Izdzyna nu sātys i juoguļ trepēs? Pi dvēselis 25 saņtimi iz nedelis? Mašyna sapleisa? Reit juomierst zemē?
A nikuo, nikuo loba nav?

Tai i saīt, vīna vaideišona i zūbu grīzšona.
Bārnam izauga jau vysi prīškys zūbi, a jis muok mozuok kai sābra Pītereits, kam tikai četri zūbi. Vari nūīt kuojom 5 kilometri, a parkū ta navar braukt ar mašynu. Sātā sataisieji remontu, īlyki dzeļža durovys, a nasaguoja naudys plastmasa lūgim. Pi olgys dalyka, a pacēle apkuris cenu. Mašyna iz lizinga, a jau saskrāpeitys durovys. Reit juoīt iz dorbu, a kolegys vīnys zarazys.

Nivīna, nivīna loba i gudra nav, tik es vīns pats. Tik es zynu, kai vajadzēja Gruzejā, kai referendumā, kai Eiropā. Vysi vīni mudaki i naudys ruovieji. A tei prezxidenta sīva vyspuor nazkaida buoba.

Pasaulī jau tai ir gona bādu, kab juos tiražeitu žuļts komentarūs i kab vaideitu par vysu.

Cyti zūg? Tu nazūdz.
Cyti mežā svīž sovys kulis ar pudelem, pamperim, ogūrču myzom? Tu nasvīd.
Cyti iz īlys tevi rupai apdzan? A tu naapdzeņ.
Cyti spļaun iz īlys? Tu naspļauņ.

Demokrateja nav lomuošonuos par cytu napadareitū dorbu, nacenzeitys iņdis publiska izguosšona i osa vysa apleicejuo kritika. Lomuotīs nudi var kotrs, tei vaira nav nikaida muoksla i par tū nalīk ni cītumā, ni syuta iz Sibiri.
Vysu pyrma tei ir atbiļdeiba kotram pošam par sovim vuordim i dorbim.

P.S. Cuolim jau ir izauguši spuorni i astis. Ka nu reita napateik rosa, izlāc vystai iz mugurys i brauc kai ar laivu.

Latgalīšu rokstu volūdys kursi byus. Reigā i septembra ūtrajā pusē. Ka SIF sakuortuos sovys naudys problemys, tod normaluos telpuos. Ka nā, tod izdūmuosim kū cytu.

3. septembrī 18:00 orienteišonuos saceņseibys ci vokora styga “Latgaliskuo mekliejumi Reigā”, 6. septembrī 11:00 Breivdobys muzejā nūvodu dzejis dīnys “Pant-Toņi” ar kūrzemnīku, vidzemnīku, latgalīšu i zemgalīšu dzejnīkim, 9. septembrī 15:00 SEB bankā (Vaļņu īlā 11) dzejis diska atkluošona, diskā 7 latgalīšu dzejnīki.