Izveiduota Latgalīšu organizaceju padūme
Dīnys golvonū dali aizjieme bīdreibu prezentacejis – eisi stuostejumi par padareitajim dorbim, situaceji iz šudiņdīnu, tyvuokajim planim. Nūtyka vīdūkļu apmaiņa, prīkšlykumu uzklausiešona.
Diskusijā izskaneja dažaidi vīdūkli, bet daudzūs punktūs tī piļneibā saskaneja. Iz prīšku juonūdrūšynoj latgalīšu organizaceju sadarbeibys koordinaceju un sistematiskumu, deļ tam dīnys nūslāgumā izveidota Latgalīšu organizaceju padūme pīcu cylvāku sastuovā: Juris Viļums, Imants Slišāns, Arvīds Turlajs, Dainis Mjartāns i Aņss Ataols Bērziņš. Jau izveiduots e-posta adress: kongress@latgale.lv, iz kuru syuteituos zinis sajims vysi pīci augstuok mynātī kongresa puorstuovi.
Kongresa daleibnīki atzeimeja, ka jau tagad latgalīšim ir pīteikami labi atteisteita sabīdreibys informiešonys telpa: „Latgolys Radeja”, internetā LaKuGa.LV, drukuotajā veidā žurnals „Katōļu Dzeive”, bet tyka izsaceits aicynuojums ari vītejom rajonu avīzem atbaļstēt latgalīšu organizaceju informaceji i vairuok rokstus publicēt latgalīšu volūdā. Svareigi ir panuokt bārnu, jaunīšu, studentu interesi par volūdu, Latgolys viesturi i par latgaliskajom aktivitatem kūpumā. Tyka izsaceits aicynuojums ituo goda latgaliskūs pasuokumus i projektus virzeit ar saukli „Latvejis vaļstei 90”, taidā veidā pīvēršūt sabīdreibys uzmaneibu Latgolys nūzeimei Latvejis vaļsts izveiduošonā.
Vystyvuokajā laikā ir vajadzeigs apkūpuot informaceji par vysom finansejuma pīsaistis īspiejom latgalīšu organizaceju projektim i aktivitatem.
Tyka izsaceits aicynuojums lītuot laikrokstā „Latvijas Vēstnesis”, 2007.goda 28.septembrī publicātūs „Latgalīšu raksteibys nūsacejumus” , kai ari snīgt komentarus i prīkšlykumus Izgleiteibys i Zynuotnis ministrejis vadeibā izstruoduotajam kūpsavylkumam par latgalīšu volūdys saglobuošonu, aizsardzeibu i atteisteibu
Tyka snīgta ari atseviška prezentaceja par interneta īspieju efektivuoku izmontuošonu latgalīšu organizaceju darbeibā iz prīšku.
Latgalīšu navaļstiskūs organizaceju kongresā pīsadaleja puorstuovi nu bīdreibys „Latgolys Studentu centrs”, nu Latgalīšu volūdys, literaturys i kulturviesturis školuotuoju asociacejis, nu bīdreibys „Kukuži”, nu „Latgalīšu Etnokulturys centra”, nu Ludzys jaunīšu kluba „Lietussargs”, nu Līpojis latgaļu kulturys bīdreibys, Latgolys tradicionuoluos kulturys centrs „Latgaļu sāta”, nu bīdreibys „Es Latgalei”, Reigys latgalīšu bīdreibys „Trešuo Zvaigzne” puorstuove, nu bīdreibys „Latgalīšu volūdys centrs”, nu Latgolys Producentu grupys, kai ari nu Latgolys Radejis i žurnala „Katōļu Dzeive”, nu Latgalīšu rokstu muzeja, bīdreibys „Naaizmierstules”, beja arī Daugavpiļs Univesritatis i Rēzeknis Augstškolys darbinīki. Kongresu ar sovu kluotbyutni pagūdynova ari Fraņča Kempa dāls – Leopolds Kemps.
Tuos bīdreibys, kas dīvamžāļ dažaidu īmaslu dieļ navarie itamā reizē byut kluot, sazynovās ar Latgolys Studentu centru i izsaceja sovu atbolstu itaida kongresa sasaukšonai: Daugavpiļs latgalīšu bīdreiba, Latvīšu katuoļu un akadēmiķu apvīneiba „Dzintars”, Rēzeknis latgalīšu kulturys bīdreiba, Latgolys Kulturys centra izdevnīceiba i Latgolys pietnīceibys instituts.
Starpcytu, 8 martā apriteja tīši 105 godi, kai iz pyrmū kūpsapuļci sovulaik Pīterpilī sasaukti pyrmuos latgalīšu bīdreibys – „Latvīšu Muzykaliskuos bīdreibys” dybynuotuoji.
Informaceji sagataveja: Juris Viļums,
projekta „Latgalīšu navaļstiskūs organizaceju kongress” vadeituojs,
26393531, jureits@latgale.lv
