Īsuocieji ar lelim sapynim: GREEN NOVICE

Tāņ i iz prīšku LaKuGa’s “Latgolys Producentu Grupys” sadalī skaitit intervejis ar latgalīšu muzykim! Itymā reizē – saruna ar grupu “Green Novice”, kuru dzīsme “Zyli malni padebeši” bejuse 2006. goda spālātuokuo dzīsme Latgolys Radejā i kas īkļauta pyrmajā “Latgolys Radejis izlasē”.

Kod, kai i deļ kuo nūsadibynovot?
Grupa dibynuota 2005. godā. Green Novice izaveidovuos deļ tuo, ka myusim gribejuos spēlēt na tik sāta, bet ari parodeit cytim kū mes prūtam.

Cik cylvāku ir grupā – kai sauc (arī nick) i kaids “omots” ?
Grupā mes asom četri goboli: Alvis Bernāns (Vacijstāvs), Zigmunds Čeksis (Zigis), Vitālijs Piskunovs (Vicja), Valdis Metlāns (Dīvam žāļ veļ nav sajiems nivīnu īsauku). Alvis dzīž i spēlej gitaru , Zigis spēlej gitaru i dzīž, Vicja spēlej basu i šod tod padzīž, Valdis ir grupys bundzinīks.

Ar kū Jius nūsadorbojot kasdīnā, Jiusu profesejis?
Alvis ir RTU students taipoš kai Valdis, bet Zigis ar Vitāliju ir LU studenti. Paralelai studejom Valdis arī struodoj.

Kai jius nūdefineitu tū stilu, kaidā spēlejot?
Grupa spēlej latgalīšu folk-rock, bet es dūmoju, ka ite gryuts koč kaidūs plaukteņūs myusus īlikt, deļ to varam saceit, ka asam latgaliski smoguokuo grupa.

Kaida ir grupys nūsaukuma rašonuos viesture?
Grupys nūsaukums roduos taids deļ to, ka iz tū momentu tys raksturova grupys muziciešonys līmeni: „Green Novice” – „zalī īsuocieji”.

Deļ kuo dzīsmis izpiļdat taišni latgaliski, ni latviski, angliski?
Dzīsmis nu suokuma tika izpiļdeitys latgaliski deļ to, ka 2005. goda Muzykys skrytulī beja nūsacejums izpiļdeit vysmoz vīnu dzīsmu latgaliski, bet mes izdūmovom, ka mes varātu ari vysys dzīsmys dzīduot latgaliski.

Kaidu zini sovuos dzīsmēs gribot paviesteit pasauļam, Latvejai, Latgolai?
Mes stuostam par latgalīšu dzeivi i izaklaidiešonūs, kai arī par gryutajim laikim, kas ir bejuši. Par vysu, kas mums ir apleik.

Kas roksta dzīšmu tekstus i melodejis?
Dzīšmu vuordu raksteišonā ir īsaisteits daudzi cylvāku, tai skaitā Armīns Bernāns, Anna Bernāne, melodejis i muzyku rokstam mes vysi kūpā. Tai kai asom folk-rock grupa, tod arī dzīsmuos izmontojom folklorys motivus.

Kaidi ir gupys tyvokī leluokī plani – koncerti, konkursi?
Grupa pašu reizi ir aizjimta ar jaunu dzīšmu raksteišonu, deļ tuo tyvokajā laikā nav koncertu, bet ja aicinosat, tod naatsaceisam.

Varbyut dreiži gaidoms albums?
Da! Grupa jau strodoj pī septeito studejis albuma! Bet, ja nūpītnai, tod dzeive rodeis. Albums byus tod, kod byus gona daudzi materiala i tys byus gotovs raksteišonai.

Saleidzynūši Jius veļ asot jauna grupa i kaidi ir tī jiusu “rozā” sapyni, kū Jius grybātu sasnīgt?
Mes asam cīš jauna grupa, bet nu ir jau sapyni kai vysim porejim. Grybātūs, kab myusu muzyku klaiseitūs na tikai Latgolā, Latvejā, bet arī cytur pasauļā. Nu i prūtams vajadzātu kaidys 10 000 000 pyrmo albuma kopejis puordūt! 😉

Voi pyrma koncertim ir izaveidovušs kaidys tradicejis, rituali kai sasagatavejot izastošonai?
Pyrma koncertu navā nūteiktu ritualu, bet cytu reizi sasalosam kūpā i mīreigai parunojam par tū, kas paradzāts koncertā.

Kas ir trokokīs, kū asot darejuši koncerta laikā?
„Green Novice” ir taida mīreiga grupa, kas pateik gon mozim bārnim, gon pensionarim, deļ tuo iz skatuvis natrokojam. 😀 Bet ir gadejīs Alvim pret mikrafonu nūlauzt prīškejam zūbam gobolu…

Kai Jiusim ruodīs: kas ir vajadzeigs latgaliski dzīdūšai grupai, kab veiksmeigai tyktu iz “lelos skatuvis” Latvejis, Eiropys šovbiznesā?
Kab tyktu tuoļuok, prūtams, ir vajadzeiga kvalitativa muzyka, bet nanūlīgsam tū, ka vāga lobu pazeišonūs i ari naudu, lai sasnīgtu augstuokus mierķus.

Kur var dzierdēt, redzēt “Green Novice”? Voi Jisuim ir fanu klubs, sātys lopa?
Myusus pyrmom kuortom var dzierdāt koncertūs pa Latgolu. Bet, ja gribīs kaut kū arī paklauseitīs sāta siežūt i dzerūt čaju, var apmeklēt draugiem.lv muzykys sadali www.draugiem.lv/music/musician.php?mid=28075 I šot tod, myusus var dzierdāt arī Latgalys Radejā. Fanu kluba veļ nav, bet, ka ir pīduovuojumi, varam izveidot.

Nūslāgumā vaicuojums: kū grybātu nūvēlēt skaiteituojim, sovim fanim i vīnkuorši tim, kam pateik Jiusu muzyka?
Pyrmom kuortom gribīs pasceit paļdis fanim par tū, ka apmeklej myusu koncertus i atbolsta myusus. Kai zynoms „Green Novice” fani ir poši trokokī i lobuokī! Grybātūs nūvēlēt vairuok cīneit i nasakautreitīs nū sovys volūdys i kūpt tū. I golvonais – vysim lobu veseleibu!

Ar Alvi sasarunova Aiga