Inga i Normunds prezentej jaunū albumu

29.novembrī Rēzeknis Kulturys nomā nūtyka dzīduotuoju dueta “Inga i Normunds” jaunuo albuma “Noslēpums” prezentacejis koncerts, kas puļceja pylnu zalu skateituoju, a piec tam leidz reita gaismai tyka sareikuots ari bals, kurymā spieleja poši pasuokuma vaininīki i gosti – grupa “Marčello”.

Koncerts tyka sareikuots diveju ar pusi stuņžu garumā. Pyrmajā daļā Inga i Normunds nūdzīdova lelu dali dzīsmu nu sova jaunuo albuma, pa vydu uzastuoja ari gosti – “Dricānu Dominante”, “Marčello” i popgrupa “Pepija”. Sovukuort koncerta trešajā daļā Inga i Normunds uzastuoja jau ar “dzeivū” sastuovu – taustiņinstrumenti, divejis gitarys i pi bungu pats Normunds. Tys beja pateikams puorsteigums vysim kluotasūšajim. I tod jau tyka nūdzīduotys ari daudzejis latgalīšim meilys dzīsmis, kurys ar prīcu leidza vylka ari publika: “Vuolyudzeite”, “Tik skaidra volūda…” i daudzys, daudzys cytys.

Koncerta laikā paļdis tyka izsaceits vysim dzīšmu autorim, kai ari albuma “Noslēpums” atbaļsteituojim. LaKuGa.LV ir pagūdynuota, ka var byut vīna nu tim.

Jaunū albumu “Noslēpums”, kai ari drusku vacuokus Ingys i Normund audioīrokstus tagad varit īsaguoduot ari interneta veikalā: Made in Latgola.LV

Gaideisim jaunys dzīsmes i vieliesim muzykantim veiksmis Latvejis Šlāgerauptaujuos!