Inficātīs ar muzyku. Trojs.
![](https://lpr.gov.lv/wp-content/uploads/2007/bodrap-bildis/933.jpg)
Suokumā vaicuošu – kaids ir Tovs eistīs vuords, kas sliepās zam sagvuorda „Trojs”?
Daudz i dažaidu īsauku maņ ir bejs, bet naz par kū nivīna nu juom nav pīlipuse, deļ tuo laikam eistīs vuords veļ leidz šam breižam palīk Normunds.
I deļ ko tīši taids nūsaukums „Trojs”, kū tys nūzeimoj, i kai jis roduos?
Maņ saīt dīzgon daudz laika pavadiet pi datora, i vismoz reizi godā pi mans atceļoj Trojan Horse… 🙂 Nu i laikam inficeits tika na tikai muns dators, bet ari es…. Deļ tuo laikam saesinojumā Trojs.
„Troja” sastuovu Tu sastuodi vīns pats voi arī tī pīsadola cyti cylvāki, i kū jī dora grupā?
Pagaidom Trojs ir vīns pots. Bet vyss kas var maineitīs…
Kai Tu paskaidruotu cylvākam, kurš Tevi nav dzierdejs – kaids ir Tovs muzykys stils, kurā Tu dzīdi?
Stilam nav nūzeimis. I par koč kaidu konkretu stilu es nimoz naasu dūmuojs.
Tu pots saceri dzīsmis – melodejis, tekstus? I par kū jimūs teik viesteits?
Muzyka i teksti ir muni. Par prīkim i bādom, kas goduos munys dzeivis ceļā. Tai pat par sapynim…var byut napīpildātim.
Kur Tu asi vuicejīs – Tova profeseja?
Rēzeknis 5. vidusškola, Juoņa Ivanova Rēzeknis muzykys koledža, Daugovpiļs Universitate (bakalaurs, magistrs ) Nu i tān struodoju par muzykys školuotuoju.
Muzyka ir Tovs hobijs voi dorbs – voi ari obi kūpā – i ar kū tu nūsadroboj ikdīnā?
Gon hobijs, gon dorbs, gon atpyuta… 🙂
Kai zynoms, Tu pīsadolīs ari cytūs projektūs… Pastuosti cik Tev jūs ir, voi Tu vēļ jimūs jam daļeibu?
Par cytim proektim….. Nu laikam, kam zynoms, tī lai zina, kam nav zynoms, tī lai šūreiz palīk nazinī 🙂 Trojs pīsadoluos tik itymā projektā… 🙂
Kaidi ir Tovi tyvuokī i tuoluokī plani saisteibā ar muzyku, projektu „Trojs”?
Plani šaidi taidi dažaidi ir, i caroms jī tiks estinuoti, bet cik stipri tys tiks saisteits tīši ar Troju – pagaidom namoceišu atbiļdeit. Nu, pīmāram, tyvuokajā laikā Trojs varātu tikt pi dzeivuo sastuova – pavodūšuos grupys.
Varbyut nimoz tik ilgi nabyus juogaida leidz „Troja” pyrmajam soloalbumam?
Pagaidom taidi dorbi nav padūmā, i var byut pat nabyus tyvuokajā nuokūtnē.
Tev bīžai saīt uzastot koncertūs? I kaidys publikys prīškā Tu jiutīs vysu lobuok?
Trojs kai atsevišķs projekts nakoncertej. Bet tai koncertdarbeiba nūteik kotru nedelis nūgoli. Runojūt par publiku- es uzskotu, ka nav lobys voi švakys publikys – vyss atkareigs nu muzykantim, nu grupys – kai jī prūt organizeit nūskaņuojumu attīceigā pasocīnī, kai jī prūt dibynuot kontaktu, obpusejū īdarbeibu ar klauseituoju, skateituoju.
Tu asi dzīduotuojs nu Latgolys. Kurā voludā dzīžūt Tu jiutīs vyslobuok – latgalīšu voi latvīšu? Deļ kuo?
Nui, es dzīžu gon latviski, gon latgaliski, gon ari krīvu volūdā. Ka byus lela vādzeiba, dzīdzuošu ari angliski, a koč franciski – ja tū vadzeis i ja tam byus pīprasiejums. Latvīšu i latgalīšu – tuos maņ ir volūdys, kas ir guojušs jau nu bierneibys – deļ tam prūtoms ir vīgluok i pošam pateikomok.
Nanūlīgsim, ka Tu esi rikteiga latgalīša skaneiga bolsa eipašnīks, stuost voi bierneibā asi pīsadaliejs dzīduošonys konkursūs, i kai ir guojs – ar diplomim pylna sīna?
🙂 🙂 🙂 Paļdis par komplimentu, bet par tū es naasu stipri aizadūmovs. Kotram cilvākam ir skaneigs bolss. Vīnkorši ni kotrs izavāluos dzeivi pavadeit dzīdūt… 🙂 🙂 🙂 Bierneibā konkursūs pīzadalejīs naasu – par tū tān varbyut i dažreiz palīk skumji, bet kai soka vīns gudrs cylvāks: „Vyss nūteik tai kai tam vāga nūtykt .” Sovukuort es soku: „Kū nasasnīdžu es, kodnaviņ sasnīgs muni bārni… :)”
Pastuosti, varbyut Tev ir bejuši kaidi leluoki voi muzuoki kuriozi iz skatuvis?
Nu visleluokī kuriozi pārosti ir kuozuos, kod Tu atbrauc kai iz prostom latvīšu, latgalīšu kuozuom, gaidi kod jaunīs puors īs iz pyrmū valsi, bet pi golda dziedri: Gorka, gorka, gorka…! Nu i tod juosoka – mes bejom treis eistyni latvīši – es, Serjoža i veļ vīns krīvs… 🙁
Kai ir ar lampu drudzi i voi atbolsti „100 grami” pyrma koncerta, kab drūsme i teiruoks bolss?
Ja gūdeigi, tys vyss par drūsmi i bolsa teireibu ir meits, cylvāku aizabiļdinuošonuos. Drūsme socās kai minimums peic 500, bet kai tod jau ar bolsu pēc tim 500 – tys ir streideigs vaicuojums 🙂 Es lobuok pīzaturūs pi sylta čaja kruškys. Bet mozs uztraukums ir veseleigs. 🙂
Kur var sastapt „Troju” – kaidi ir tyvokī koncerti, pasuokumi?
Ja itys byutu raidiejuma tīšīs ēters, es atbiļdātu, ka Troju vareis satikt raidiejuma atkuortuojumā. Bet cytur pagaidom laikam ni kur… 🙂
Tev ir sova sātys lopa voi fanu klubs – kur var atrast kaidus kontaktus ar „Troju”?
Sātys lopys pagaidom nav, bet byus. Varbyut na tīši kai Troja sātys lopa, bet saisteibā ar darbuošonūs, kur vīns nu elementim ir Trojs. Vīneigīs, kur pagaidom koč kū var atrost par Troju ir draugiem.lv mūzikys sadalī.
I nūslāgumā, kū Tu grybātu nūvielēt sovim fanim i LaKuGa skaiteituojim Jaunajā 2008. godā?
Nu drūši viņ lai itys gods jīm ir veiksmeiguoks par veiksmeigū pagojušū godu, lai ir velmis, kū pīpiļdeit, i sapyni, kū eistynuot. Klausitīs muzyku deļ tuo, ka muzyka ir spāks, kas var likt i smītīs i raudot…Laimeigu Jaunū Godu!!! 🙂
Ar Troju sasarunova Aiga