Grupai „Dabasu Durovys” seņtebrī pyrmais muzykys skrytuļs

2008.gods seņtebrī tiks izlaists latgalīšu rokgrupys „Dabasu Durovys” pyrmais myzykys skrytuļs (disks) ar nūsaukumu „Ļepetņīks”. Albumā apkūpuotys 11 dzīsmis, nu kurom zynomuokuos ir „Bezpruotā”, „Vipingys blūzs”, „Piparmātru čajs”, „Maņ nav” i cytys.

Dzīsmu muzykus i tekstu autori ir grupys muzykanti Arns Slobožaņins, Juoņs Veliks, Egils Kulmanis, a dzīsme „Soldons leits” radeita sadarbeibā ar Latgolys jaunū aiļinīku Oskaru Orlovu (Raibīs Suņs).

Muzykys skrytuļs „Ļepetņīks” teik izlaists, lai veicynuotum latgalīšu jaunuos rokmuzykys pīejameibu Latvejis i pasauļs muzykys apritē, lai aktualizātum latgalīšu volūdys daudzveideigu lītuojumu i lai raiseitum jaunīsu interesi par radūšajom izpausmem muzykā.

Grupys „Dabasu Durovys” muzykanti stuosta, ka grupai skrytuļa izdūšona ir kai loģisks pīturys punkts radūšajā darbeibā. Arns Slobožaņins stuosta, ka klausūtīs albumā izdūtuos dzīsmis, klauseituojs varēs dzierdēt, kai grupa ir izaugus diveju godu laikā.

Albuma dzīsmis īraksteitys „Rīgas Skaņu ierakstu studija” i „Latgolys Radejis” īrokstu studejā laikā nu 2006. da 2008.gadam. Albuma miksu i māsteringu veice Armands Treilihs.

Lai sasatyktum ar sovim atbaļsteituojim, septembrī nūtiks vairuoki jaunuo skrytuļa prīškāstateišonys pasuocīņi.

10.seņtebrī Daugovpilī hotel “Latgola” restorānā “PLAZA”, 12.seņtebrī Reigā, klubā „Depo” i 20.seņtebrī latgalīšu meilys dzīsmu i aiļu festivalā „Upītes Uobeļduorzs”.

Grupys „Dabasu Durovys” muzykys skrytuli „Ļepetņīks” izdūd „Latgolys Producentu Grupa” ar Valsts Kultūrkapitāla fonda Latgales programmas, Latgales Reģiona Attīstības aģentūras, Latgales Reģiona Tūrisma asociācijas un Aglonas Tūrisma informācijas punkta, park hotel „Latgola” restorāna „PLAZA” i kluba „Depo” atbolstu. Informativī atbaļsteituoji – „Latgales Radio”, „Latgales Reģionālā Televīzija”, „Latgales Laiks”, „Vietējā Latgales Avīze”, „Radio Sigulda”, portali www.latgale.lv, www.lakuga.lv i.c.