Frīzu pīredze Latgolā

Nu 25. – 28. martam Rēzeknis Augstškolā (RA) dorba vizītē vīsovās Frīzu Akademijis Merkatoru volūdu vuiciešonys i multilingvaluos izpietis centra puorstuovji, profesori Tjērs de Grāfs (Tjeerd de Graaf) un Kors van der Mērs (Cor van der Meer), kai ari Sanktpēterburgys Universitatis latgalistikys pietnīks Aleksejs Andronovs.

Rēzeknis Augstškolys Filologejis katedrys docātuoju sadarbeiba ar Merkatoru volūdu vuiciešonys i multilingvaluos pietnīceibys zynuotnīkim nūteik jau ilguoku periodu. Da šam RA docātuoji ir bejuši vīsi centra reikuotajūs pasuokumūs, gon saisteibā ar regionalūs i minoritašu volūdu vaicuojumim, gon ar Eiropys Savīneibys volūdys politikis aspektim. Tei ir pyrmuo reize, kod Merkatoru centra puorstuovji beja Rēzeknē, bet, kai sovu dorba vizīti vierteja poši volūdnīki, tod jī ir puorlīcynuoti, ka nūteikti atsagrīzsīs ar jaunim projektim i pīduovuojumim Latgolys multikulturālajā situacejā.

Vizītis laikā gosti īpasazyna ar vītejū situaceju minoritašu volūdu politikā, aktualizejūt diskuseju par latgalīšu volūdys vaicuojumim, statusu Latvejis vaļstī. Docente Sanita Lazdiņa prezentēja Latvejis i Latgolys etnokulturis statistiku i analizēja izgleiteibys politiku Latvejā, bet docentis Ilgys Šuplinskys prezentacejā varāja vairuok uzzynuot par aktivitatem latgalīšu volūdys i kulturis saglobuošonā i atteisteibā, akcentejūt RA lūmu i darbeibys vierzīņus.

Frīzejis (Nīderlandis regions) volūdnīki tykuos ar RA studentim, Rēzeknis 6.vydsškolys, Rēzeknis Pūļu vydsškolys, Nautrānu vydsškolys i bārnuduorza audzieknim i školuotuojim, Nacionalūs bīdreibu puorstuovim, stuostūt par volūdys atteisteibys i apvuiceibys īspiejom trilingvalā sistemā, ruodeja statistiku, kas aplīcynova, ka izejis punkts 50 godu atpakaļ frīzim beja taids, kai itymā breidī ir latgalīšim. Ja regionalū volūdu saprūt, tymā runoj leluokuo daļa regiona īdzeivuotuoju, tod tymā skaita jau tikai ap 40 % īdzeivuotuoju, bet raksteitpratieju skaits ir tik napylni 20 %. Tyka sprīsts gon par Latgolys školu īspiejom pīsadaleit Merkatoru centra veiduotajā Eiropys školu sadarbeibys projektā „Network of schools”, gon par aktualitatem i problemam Latvejis bilingvaluos izgleiteibys pīduovuotajā modelī, kai ari par latgalīšu volūdys revitalizacejis faktorim.

Juoatzeist, ka pyrmū reizi panuokts ari konkrets ES realizātuos mozūs i apdraudātūs volūdu politikys reiceibys sūļs regionalūs volūdu lītā. Ituo goda laikā RA docātuoji S. Lazdiņa, I. Šuplinska i H. Martins (H. Marten) apkūpuos informaceju par izgleiteibys politiku Latvejā i latgalīšu lūmu tymā, kai ari snīgs puorskotu par RA projektu „Etnolingvistiskuos situacejis apzynuošona Austrumlatvejā.” Apkūpuotais materials tiks publicāts anglu volūdā i izplateits vysā Eiropā regionalūs volūdu dosjē formātā (elektroniski i gruomotā). Tī, kas interesejās par minoritašu, regionalūs volūdu problemom i aktivitatem, var skaiteit Merkatoru centra sātys lopu: www.mercator-education.org/ Un tī, kas var paleidzēt ar konkretim pīmārim par latgalīšu volūdys lītojumu fakultativūs, interešu voi amatu (profesionalajā) izgleiteibā, lyudzam raksteit iz san@ru.lv Regionalūs volūdu dosjē raksteišona ir vīns nu veidim kai pīsadalēt izgleiteibys politikys realiziešonā i tuos optimiziešonā Latvejā.

Aicynojūt iz sadarbeibu,
RA docente Ilga Šuplinska