Dzejūli / Baiba Zveigule

Bez nūsaukuma

Man simpatizej alņs
Na jau tys, kas izplāstim rogim pa mežu skrīn,
Bet tys alņs, kas šūbreid sied iz muna golda
Nā, man golds nav lels
Bet alņs tī labi izīt
Jis stuov iz divom tīvom kuojom
i rūkuos tur svečturi…
jyus esit redziejuši alni,
kas tur rūkos svečturi?

mes

Paralelys linejis, paraleli cylvāki, paralelys dūmys,
kas tod ir, kod piekšni pajam tuos parelelis i puorsakrustoj?
Saīt rūtains laukums, flīzeitem izlykta greida, šaha golds,
bolts malns,
bolts malns.
Karali, dāmys, tūrni, bandinīki
zyrgi (i laikam cyti lūpi).
I ajam pa dzeivi kuo pa šaha gaļdeņu ,
bolts malns,
bolts malns.
Kuodu apmuona, nūsyt,
i ar lelu smogu rūku nūvuoc..
Leidz otkon palīk tikai
bolts malns,
bolts malns.
I kotru reizi, cyta rūka Tevi smogai nūvuoc…

Vairuok kuo nasaprosts

Iz viersu
Iz leju
Apmat apleik
Izvalk cauri
Apgrīžn ūtraiduok
I suok nu gola
Satambūrieju sovys dūmys kūpā
I izduovuotum tev
Bet tu nasaprūt
Tu vyspuor nikuo nasaprūt nu tambūriejumim
Par tū i niuļa tikai luopu

***

Namozguoti aizkari korojās pi muna lūga, slāpdami uorpusi…
Nazynu voi naaizmozguoju aiz tuo ka slynkums,
Nav breiva laika, voi otkon naudys mozuok pasagadiejs
Ispiejams, ka deļ tuo, ka nagrybu redzeit, kas aiz sīnom…
(Dziļš nūsapyutīns. )
Nikas nav tuo, kuo izaver…
I varbyut pat mozuok apsamuoneišu,
Ka šūgod aizkarus naizmozguošu!

Navar²

Man napateik, ka ustobā ir daudzi stuņdinīku.
Man napateik jūs vīnuoduo tikšķeišona.

Nā es eisti jūs nadauzu, bet nūgloboju skapī.
Nā es napierku jaunus, jī īsarūn poši.

Munam skapam durss lyust uorā.
Munam škeletam tī vairs nav vītys.

Pastotu sovus stuņdinīkus otkon pi sīnom.
Pastotu sovu kaulainū atpakaļ koktā.

Laiku navar aptureit nūsliepūt vysus stuņdinīkus.
Laiku navar atgrīzt, lai koč kū lobuotu.