Dodza lopys

Ja ir izviele, to puorzavītuošonys leidzekli leluokim atuolumim izavālūs autobusu. Viļcīņim nav nikaidys vaineitis, tok napateik pretīsādūšajam vysys tuos puora stuņdis nakauneigi viertīs sejā, izalīkūtīs tū nadorom 🙂 Prūtams, ka leluoka draugu braņdža, to viļcīņī vīgļuok rozaplest. Autobuss tymā ceļā izaveidoj, kai slāgta sātys ustoba. Pietejūt i klausūtīs ļaudīs var izfunktīrēt gondreiž vysu juo dzeivis ritiejumu. Autobusūs ari čūksts mozuok tierpst. Vot tai ceļojūt, vārdamīs pa lūgu var daudzkū puordūmuot…..

Dūmys aizguo da vacajai dzīsmei : latgalīši – latvīši. Pīmāram, kleistūt pa globālū teimekli – škārsteiklu, ari taipat runojūt ar puornūvodnīkim par aktualom temom, ir nuocīs uzadūrt iz vysaižuokim komentarim – latgalīši jau taida zaraza – latgalīši jau tok ir puorzakrīvuoši, i.t.t. Tīšom pazaklausūs apleik vysaida vacuma cylvākūs rūdas vaicuojums – kai ta mes te eisti runojam?
Davesšu pīmāru nu tuo poša autobusa. Aizmugurē sēdē divejis videjuo vacuma sīvītis. I vysu ceļu nu Daugpiļs da Rēznei varē acaklausēt jūs sarunys.

Poša pyrmuo :
– Oi, privecik!
– Nu, vasala, vasala!
– Skotūs tu nu rynka.
– Da vot šū tū zakupilas.
– Nu, ja, nu ja. Tai jau ir….. Zyni tī rynkā pi glavnuo vhoda ir lavočka ar lobom belorusskuom kalgotkom.
– O, da, da. As zynu. Jau tī kupila sev i dočai. Da maņ tei prodavšica znakomuo, jei maņ daž skidku sdzelala.
– Oi, ņegovori! Moš meitai kū izlaidumam pierki?

…………………. nu i tai tuoļuok.
Izkuopūt golastacejā sazagribē pavemt.

Nikas jau tovu duorzeņu naaizlaiž, kai viņ tu pats. Prūtams, koč kū kūpt, atteisēt i veiduot ir gryušuok, nikai vīnkuorši attaisēt durovys i pamest juos vaļā, lai lein šķeti vydā. Paradoksali, bet tai tys nūteik te Latgolys kuļturviesturis golvyspiļsātā. Pi pavasara moš apsavērsim sevi nu molys i salasēsim tūs akmiņus i saliksem vīnuvīt, navys laiskai laissim puori žūgam……ai, lai sābris losa.

Turitēs da beidzamuo!