Cyta Latgola III

Kai tī beja, kai nabeja… Kai byus, kai nabyus…. Bet pījimsim, ka niuļa ir kaids 21XX.gods. Daudz laika nūskriejs, daudz vaļdinīku nūsamainejs, daudz šmakovkys pītacynuots… tai jau ir „nikas nasabeidz i nikas nasuoknās nu jauna, vyss tikai turpynojās”. Varbyut myusim izadūs kūpeigim spākim sazeimeit, kaidys varātum byut latgalīša dūmys i puordūmys 22.godu symtā? Īspiejams tei byus pavysam cytaiduoka Latgola. Voi var byut, ka jei poša byus pavysam cytā vītā?

Cik latgalīšu beja 21.godu symta suokumā?

Vasali, tai saceit, sveicīņs nu 22.godu symta latgalīšim!
Tagad atrodu informaceji, ka tymā tuolajā 2008.godā bīži viņ runojūt par latgalīšim suoce tūs saleidzynuot ar lībīšu stuovūkli Latvejā. Tai kai obeji meklejuši koč kaidu uzmaneibu nu vaļsts īstuodem sovys identitatis saglobuošonai – sovu tīseibu īvāruošonai. Pat ministri muocejuši pastuosteit, ka Latvejī ir 84 voi 143 lībīši (itūs skaitļus precizi naatguodoju, kotrā zinī skaidrs ir vīns – lībīšu beja palics pavysam, pavysam moz, deļ tam īspiejams jūs i saskaiteja). Kai jau īprīškejā stuostā runovam – nivīns tymā 2008.godā navarie pastuosteit, cik ir latgalīšu? 100, 200, a varbyut 3000? Varbyut 400 tyukstušu? Varie saukt sevkuru skaitli i īspiejams byutum taisneiba!

Piec puors godim: tyka sareikuots ari Vyslatvejis konkurss, kura golvonuo bolva beja jauna automašyna. Konkursā beja tikai vīns vaicuojums – cik ir latgalīšu? Beja juonūsauc konkrets skaitlis. 😉 Kai vāluok izaruodeja, konkursa organizatori tai izjūkova vysus, deļ tam, ka daže Latvejis vaļstei nabeja itaidys informacejis.

Niu precizi nazynu, voi piec puors godim, a varbyut piec vēļ kaidim 20 tyka ari tautys skaiteišonys anketuos īkļauts vaicuojums, lai nūskaidruotu, cik daudzeji latvīši muok latgalīšu volūdu, cik daudzeji muok tymā raksteit, cik daudzeji nu jim sevi uzskota ari par latgalīšim… Ja nasamoldu, tod tikai piec tuo izadeve panuokt, kab latgalīšu volūdu ari bārnim pavuiceitu koč drusceni, a to izaruodeja, ka sevi par latgalīšim skaita pulka ļaužu, a raksteit vysā vaļstī muoceja tikai 47 cylvāki.

Ari pensionari tūreiz praseja leluoku pensiju. Uorsti i mediciniskais personals praseja olgys paaugstynuojumu, tai pat ari školuotuoji, policisti… orūdbīdreibys aicynova vaļdeibu īsaklauseit prīkšlykumūs. Bejušys ari puorrunys, uzklauseiti vīdūkļi, tykuši maklāti rysynuojumi… Koč ari, gūdeigai sokūt, tys vyss beja tikai deļ skota.

Ari latgalīši uzraksteja viestuli iz ministrejom ar aicynuojumu īvāruot vaļsts volūdys lykumu i izstuosteja sovu pošaizlīdzeigū gataveibu paleidzēt ar prīkšlykumim, ar dorbim (tai pat kai i leidz tam latgalīši beja struodovuši bez atleidzeibys, lai sagluobtu sovu volūdu, sovu identitati).

Laikam puoruok pazemeigai latgalīši suoce rysynuot itū vaicuojumu? Vysaidys ministrejis atraksteja atbiļdis viestulis ar pateiceibys vuordim: „Paldies, ka rosinat jautājumus par valstij svarīgām lietām un skaidrs, ka vajag saglabt latgaliešu valodu vai dialektu…”

Itais termins iz reiz skrie pruotā vysim, kas mekleja kaidu atrunu. Kas tūreiz darejuos myusu vaļstī? Trokums nazkaids! Nivīns navarie uzajimt atbiļdeibu par naizdareitū, a golvonais – nabeja nivīna, kas uzajimtu beidzūt suokt dareit tū, kas latgalīšim beja atjimts godu symtus.

Labi, ka niuļa, 22.godu symtā, myusim koč vairs navajg tik bierniškeigi skaidruotīs iz kotra styura!

Nuokamūs stuostus klausotēs Latgolys Radejā pa svātdiņom, voi gaidit, kod LaKuGa.LV nūpublicēs. 😉