Cyta Latgola

Kai tī beja, kai nabeja… Kai byus, kai nabyus…. Bet pījimsim, ka niuļa ir kaids 21XX.gods. Daudz laika nūskriejs, daudz vaļdinīku nūsamainejs, daudz šmakovkys pītacynuots… tai jau ir „nikas nasabeidz i nikas nasuoknās nu jauna, vyss tikai turpynojās”. Varbyut myusim izadūs kūpeigim spākim sazeimeit, kaidys varātum byut latgalīša dūmys i puordūmys 22.godu symtā? Īspiejams tei byus pavysam cytaiduoka Latgola. Voi var byut, ka jei poša byus pavysam cytā vītā?

Cyta Latgola

Hm, i nazynu kai suokt. Redzit, līta taida, paguojušajā nedeļā nusvieniejom ar draugim 21XX.goda sagaideišonu. Drusku īdzērem, sadzīdovam, parunovam par šū i tū, nūsaklausejom vacum vacūs audioīrokstus par Pīteri, par Terēzi i puorejim jūs draugim, kai jī guojuši iz Aglyunu svātceļuojumā… bet nu tys ir vairuok kai 100 godus vacs audioīroksts, kū Jezups sorgoj sovā kolekcejā, kai pīmini nu prodzeda. Izaruodīs, ka tys pats Pīters bejs Jezupa dzeda tāvs – nu taitod saīt: mīseigs pro-dzeds… Voi tei taisneiba, voi nā – kaida tam vars niu starpeiba?

Vuordu sokūt, nazynu tik smolkai vysus tūs rodu rokstus, bet izdūmovu leidzeigā veidā, kai Jureits tū dareja „Dvēselis Remontā” pastuosteit jiusim par tū, kai mes dzeivojam niuļa – ir tak paguojuši vairuok nakai 100 godu – troks var palikt! Ari mani sauc Jurs, deļ tam tai nu saīt, ka asu Jureiša vuordabruoļs.
Iz reiz juoizstuosta, ka mes latgalīši tagad lelā skaitā apdzeivojam Spanejis austrumkrostu. Deļ tam ari tei jaunuo goda sagaideišona niu ir dīzgon sylta padareišona. Labi, ka vēļ jūprūjom var dabuot vāsa ols, tai ka dzeive ite nav tik trokai napanasama. Bet jiusus vys jau ka vairuok izbreineja na tys vāsais ols, a tys, ka latgalīši niu „dzeivojūt Spanejā”. 😉 Tak meiginuošu par vysu stuosteit piec kuortys, deļ tam drusku pazacītit – pīnuoks laiks ari itaidam skaidruojumam.

Nu vot, kai jau saceju, nūsviniejom gondreiž pyrma nedelis mes tū Jaungodu, īdzērem ols, ari drusku šmakaucenis. Tuos pagataviešonai Jezupam bruoļs nu Latgolys atsyutejs vajadzeiguos sastuovdalis: graudus, apeiņus i kas tī vēļ vajadzeigs… As tik smolkai nazynu, Jezups golvonais „specs” pa itaidom lītom, byus jam vāluok juopavaicoj recepts.

Šmakaucenis sasyldāti sadzīdovam. Da, gondreiž pavysam damiersu pastuosteit, ka bejom nūguojuši ari čiguonūs – apguojom kaidys 20 tyvuokūs draugu sātys, sapeļnejom gona vysaidu lobumu, tod vēļ pazavolkovam pa jiurys krostu, sakurynovam guņkuri gondreiž kai iz Juoņu dīnu. 😉 Vuordu sokūt, labi atsapyutem. Sagaidejom jaunū godu piec Latgolys laika, a piec tam ari kūpā ar spanīšu draugim ari piec jūs stuņdinīka – tai saceit – dubulti svātki saguo!

Deļ myusim tagad nav svareigi, kaidā pasauļa molā esim, bet svareigi ir saglobuot sevi, sovus draugus, i stuostam ari cytim par myusu Spanejis latgalīšu koloneji ar nūsaukumu „Cyta Latgola”. Aicynojam braukt pa pasauli nūkleidūšūs latgalīšus iz šani – ite mes draudzeigai dzeivojam – ceņšamīs radeit maksimali latgalisku vidi.

Kab jiusim byutum mošeņ lobuok saprūtama niulinejuo situaceja, nuokamajā gobolā izstuosteišu, tai vyspuoreigi, senejū viesturi, deļ kam vyspuor itaidu „Cytu Latgolu” beja īspiejams izveiduot.

Kotru svātdini itūs stuostus ir īspiejams dzierdēt Latgolys Radejā