Čipierkstneits

Seņuok, kod vysi latgaļi beja viņ prostī i nabogī zemnīceni, jīm beja taida svora voi daudzuma mārvīneiba – čipierkstneits. Tys beja tik daudzi, cik varieja panymt ar četrīm pierstīm. Īrosts beja pi sābru aizanymt čipierkstneiti suoļa, sodys voi tabaka smeļknis. Čipierkstneišūs mierieja i sākaru, ka jov kam na viņ tys beja.

Itymūs laikūs, kod ir vysaida izmāra lizeicenis i videļceiši, par rumceņuom i narunojūt, ir juosoka, ka čipierkstneits pavysam aizmiersts.

A maņ grybātūs aizrunuot Reigys bagaturus, lai jī atguoduotu itū mārvīneibu, kod lobumi juodola – latgalīšīm. Kai na kai, patīseibai ir juosaver acīs. Lai jov teik grami, kilogrami, centneri i tonnys Apreigys ļaudīm. A naboga latgalīšam – kod čipierkstneiti vādzātu gon atsvīst.

Sovaižuok saīt, lyuk, kai! Vysu banku, apdrūšynuošonys sabīdreibu, lobdareibys organizaceju, lylūs privatstrukturu pa vysuom nūzariem golvys, voi golavuorda turātuoji ir Reigā. I vysu lobumi Reigai viņ atlāc. Tys ņikas, ka vysu itūs Reigys kungu boguoteiba kulduos sakreit i nu jūs filialdarbeibuom Latgolā, kai soka nu bednuo latgalīša atlāc goņ, i loba dale atlāc. A kod latgalīts prosa sovai kulturai i sovai dzeivisvidis sakūpšonai, sovam nalelajam prīceņam, to Golvysveiri i golvyssīvys Reigys apartamentūs aizrunoj skaidru navolūdu: „ Jī atbolsta Vyslatvejis, vystautys i pasauļnūzeimis projektus, a taidim lokalīm latgolys latgaļu projektīm jīm naasūt naudys.”

Ot tai! Ņi čipierkstneiša atpakaļ nateik atdūts nu tuo, kas ir nūsmalts nu bednuo latgalīša kuldys. I vysi ir ar tū mīrā. Tok teik pabaļsteita naboguo Vyslatvejis vystautys politika i kultura, kas izīt pasauļa apartamentūs …

A pa tū pošu laiku – ņi čipierkstneiša nasanāmusi, Latgolys latgaliskuo dzeive īt zyudeibā, tai ņikod napalykdama par pasauļa apartementīm nūzeimeigu paruodeibu.

A mož – vādzātu goņ īvīst taidu mārvīmneibu – čipierkstneits i Reigys govyskungīm i kundziem daspīst ītū čipierkstneiša daleni atdūd dieļ latgaļu lobuma?