„Bez PVN” divi tyukstūši ostoitais

Kod otkon paīt gods, tai viņ gribīs pasavērt atpakaļ i atsacerēt padareitū. Grupai „Bez PVN”, kas tikkū atzeimova sovys pastuoveišonys 5. goda dīnu, 2008. gods bejs ražeigs.

Skrīšonys padareišona

Vīnnūzeimeigai par goda veiksmi uzskotama dzīsme „Screen” (nūsaukuma vuordu spēle gon mulsynuojuse daudzus, bet kaidu reizi var i pasaspēlēt), kura klauseituoju ausim nūdūta goda ūtrā pusē i septembra mienesī dīnys gaismu īraudzieja ari dzīsmes video klips – grupai pyrmais taids pa eistam! Zam „skrīšonys” zeimis tod pavadāts vyss 2008. goda 2. pusgods – ar sekmeigu daleibu radio staceju topūs, video klipu topūs i veļ dažaiduos bolsuošonys aktivitatēs.

Topi i natopi

Turpynojūt par „Screen”, tod itei dzīsme izaruodeja cīš pateiceiga daleiba dažaidūs Latvejis radeju staceju topūs. Pyrmū reizi kaida grupys dzīsme īkliva gondreiž vysu Latvejis regionalūs staceju muzykys topūs i puorsteidzūšuokais – vysuos starteja pozicejā nr.1! Tī aplausi tikai i vīneigi myusu „aizmugurei” – atbalsteituojim! Pyrmuos vītys gon Latgolys Radejis, gon Valmīrys, gon Kurzemis, gon Radio 3 topūs! Taipat ari dasacejom sovu daleibu niu jau ar trešū miegynuojumu Radio SWH „Priekšnams” (latgaliski – Since), kur grūzejomīs vasalus 4 mienešus! Juoatzeist, ka itys pasuokums byus juoatlīk iz cytu reizi – tuoļuok tikt tai ari nasaguoja.

Ari myusu video klips dzīsmei „Screen” sekmeigai starteja Latvejā asūšajūs video klipu topūs. LTV 7 „SeMā” klips pyrmā vītā tai ari palyka nasatrycynuots vysys nedelis. Veiksmeigs izaruodeja ari starts Latvejis Muzykys kanala TOP 20, kur video gondreiž vysu laiku atsarūn pyrmā desmitā, vīnu reizi izkuopūt ari gūdalguotā pyrmā vītā!

Interesanta izavierte ari daleiba Latvejis muzykys topu apkūpuojumuos: Latvian Airplay TOP 50 i Latvian Music chart TOP 20, kur obejūs topūs „Screen” daudzys nedelis (pi 10) atsaroda pyrmā sešinīkā i vysmoz pusi nu tom pot 2. vītā, kas ir grupys sasnīgums itymūs topūs i ari kaida latgalīšu iziļdeituoja ūtrais lobuokais sasnīgums (aiz Borowa Mc). Itymā reizē nikai auškuok nasaguoja, bet leidz ar tū palīk dorbs jaunom dzīsmem.

Par interesantom topu „akcejom” izavierte grupys daleiba konkursūs – „Nissan Urband Playgraound” i „Klubu nakts Top 90”. Pyrmā dažaidu mistifikaceju rezultatā izadeve tikt daže finala 18-nīkā i pyrmū reizi uzastuot stykla byureitī, bet ūtrā topā nu popularuokom 90 dzīsmem „Bez PVN” dzīsmis izaruodeja vasalys treis, par kū, prūtams, prīca, bet rezultatā nikas tuolejūšuoks nu tom miksu i klubu padareišonom naizaveidova.

Koncertu dzeive

2008. godā grupa pīsadaliejus ap 15 dažaida mārūga muzykaluos koncertaktivitātēs. Itūgod vasalys treis reizis tyka pīdzīduotys „Studentu Kluba” sīnys, pyrmū reizi atsazeimuots klubā „DEPO”, taipat aktivi pīsadaleits koncerttūrē „Taiseits Latgolā” (Preiļūs, Rēzeknē, Kuorsovā), tradicionali atsagrīzts Upeitī iz „Uobeļduorzu”, kai ari padzīduots veļ cytur gon Latgolā, gon puorejā Latvejā.

Goda nominacejis i debejis

Gods grupai īsasuoka ar nominacejom i var saceit, ka ari nūsaslēdze. Par senuokim dorba auglim – grupys debejis albumu „Pyrms vuorda” „Bez PVN” sajieme sovu pyrmū nominaceju Latvejis muzykys īrokstu Goda bolvā kai „Goda debeja”. Tīsa, beja tys gūds pīsakuops Artim Gāgam, bet vīnolga nūzeimeigs sasnīgums grupys CV, kuru gon vaira naatkuortuot. 🙂 Oktobra beiguos tika sajimta ziņa, ka vys tik ari „Bez PVN” sajāmušs sovu pyrmū konta numeru MB 179 Latvejis Radejis 2 „SEB Muzykalajā bankā”. Pasasokūt atbalsteituojim tyka nūstarteits gūdam novembra mieneša kūpviertiejumā īsaryndojūt 8. vītā, bet leluokais i pateikamuokais puorsteigums beja aptaujis producentu pīškiertuo specbolva kai „Goda spylguokai debejai”. Kū lai soka – prīca censtīs! Itys gon ari ir naatkuortuojams sasnīgums, bet kotrā ziņā veiksmeigs starts turpmuokom aktivitatem.

Šovu aicynuojums

Interesants gods sovā zinī izavierts ari grupys daleibnīkim atseviškai. Kips (Kristaps Rasims) pyrmū reizi paraudzieja „Eirovizejis” gaismys konkursā startejūt kūpā ar grupu „Borowa Mc”, bet daGunchi (Guntis Rasims) pījieme Ata Auzāna aicynuojumu daleibai TV3 šovā „Kūru kari” i oranžuo Daugovpiļs (tautā saukta par Latgolys) kūra sastuovā plyuca ari uzvarātuoju laurus īkarojūt nadaleitys TV skateituoju simpātejis.

Saimisteiba

Pa godu na viņ dzīduots i pīsadaleits topūs i konkursūs, bet ari izlobuota „saimnīcyskuo situaceja”. Tai, pīmāram, 2008. godā tyka izsuokta sadarbeiba ar muzykys portalu www.platformamusic.lv i pyrmū latgalīšu škārsteikla veikalu madeinlatgola.lv, kur obejūs niu ari var īsaguoduot koč kū nu „Bez PVN” daiļradis. Pa godu grupa tykus pi jaunom mieginuojumu telpom, daGunchi – pi jaunys akustyskuos gitarys, Kips – gon pi jaunys elektriskuos, gon akustyskuos gitarys, gon pi vargana, kai ari manomi uzlobuojumi skatuvis tālā i tān varam pasalīleit ari ar jaunom grupys vizeitkartem. Kai smejīs – dzeive īt iz prīšku!

Zam beigu gribīs saceit lelu PAĻDIS vysim myusu atbalsteituojim, draugim i leidzjutiejim, kas bejušs ar myusim gon 2008. godā, gon vysu pīcu godu garumā! Grupa naguļ i car Jaunu godu īsuokt ar jaunim dorbim i puorsteigumim klauseituojim. Sasateikam ari 2009.! 😉