bejušuo laika smiļkts

Kab suoktu, ir juopabeidz.

Kab spani pīsmaltu, jis ir juoizlej.

Kab īelpuotu, ir juoizelpoj.

Sevkura nūstuošona ir ceļa suokums.

Sevkura krize ir sevī aizasprīduse izvēle.

Kurs spers pyrmū sūli, byus pyrmais.

____ _ _ _

kur tu beji, kur tu beji

kur tu beji, naej.

tymā vītā dzeļža kuojom staigoj kuopurkēdis

tymā vītā smiļšu kolni kuop nu zemis vyda

tymā vītā nabyus mīra.

kur tu beji, nalein

tymā vītā cyti laiki.

____ _ _ _

tukšuos mīsta ūļneicuos kleistu

laika skoborgys īsacierš acīs –

pogolma osuo smiļkts.

es beju

pi bazneicys duorza stuov zyrgs

jis aizlyudz par žiguļu dzeivem.

īguodoj seve

bolti kačeiši saulē loksta pi magazina

i Vybornūs Zina otkon aizīt kai dzeiva

izlīt aiz pakša sūmozgu spani

juos muosa ir puordevieja.

sābru Ani aizvad ar zyrgu

lai vīgla bejušuo laika smiļkts

es lyudzu par sovu i tovu dzeivi.

____ _ _ _

laimis volūdā runoj laiks

i laikam jam škeiba mute

gribēja nazkū saceit

čut nalaimis napīsauce.

muna pasauļa kuormūs īt remonts

špaktelej dzeivis jāgu.

es zynu – maņ navajadzēja

es nazynuoju kur liktīs

šaļtim dzeivei nav jāgys

par daudz iz špakteļa ceri.

____ _ _ _

kod nabejs bejušūs pasauļu gaismā

kur laime byus nalaimei muosa

i smierts byus jūs obeju tāvs

es aizrunuošu par dzeivi

i laime byus betona kruosā.

tai nikod nabeja bejs

tai nabyus pa eistam

boltom pučeitem sazīdēs pamastuos fermys

seikom plitkeņom izlykti aizgoldi

i suņubūrkšūs sēdēs kaids cyts.

betona stalažu gindini dabasūs kuops

stuovēs par tovu i munu myužu.

teļu dvēselis kircinēs grīstūs vasalom čečem

aizagivušys betona kūka betona ligzduos.

junī pasauļam augsti grīsti.

es nabeju, nabeju, napagaisu

tik pamastuos fermuos bejušuo laika gols.

laiks sviļpuos ap betona kuormim

seiku dvieseļu zīdeni

izaugs par myusu myužim.

pasaulī vaira laimis kai dreikst.