Aizguoja myužeibā Osvolds Kravaļs

Ituo goda 30. junī ap pusčetrim dīnā nūmyra latgalīšu dzejnīks i kulturys darbinīks Osvolds Kravaļs. Jis beja pyrmais, kurs atsagrīze nu Reigys dzeivuot Latgolā (1985. godā), pyrmais, kurs suoka runuot par latgalīšu kulturys bīdreibu vajadzeibu (1987. godā), talanteigs dzejnīks i esejists, nu kura apmāram 400 dzejūlim ir da šam publicāti kaidi 50. Palykušys ari juo dīnysgruomotys, kurys jis raksteja nu 1982. goda da pošai nuovei, tamuos dokumentāta Latgolys kulturys dzeive. LKC izdevnīceibai 16. junī jis īdeve sovys nu 1985. goda da 2008.godam raksteituos gruomotys “Atpakaļ iz Latgolu” manuskriptu. Turēsim nūceju, ka itei gruomota īraudzeis sovu skaiteituoju.
Apglobuots tiks 3. julī Daugovpilī Stropu kopūs.