Vuodeiguo vara.
![](https://lpr.gov.lv/wp-content/uploads/2005/dezuratteli/287.jpg)
Ka vuodeigū dzeramū i ādamū var izlīt māslūs voi cyukuom sabaruot, to ar politiskū varu tai naizdareisi. Vuodeiguo, beidamīs slimeibu i nuovis, ļauds ņi ād, ņi dzer. A vuodeiguo vara – vys turīs pi varys i nadūmoj par tū, ka teik saslymdynuota tauta, ka teik nūmierdeita tauta. Izaruodīs, ka varai sovs vuodeigums navuodej byut pi varys. Kai tys nyvle ir i pi myusu …
Sasavuodejūšais produkts smyrd voi ir piec garšys nagords. A sasavuodiejušuo politiskuo vara īt pret tautys grybu i lem napatautys izdzeivuošonys iņteresīm. I itei vuodeituo lemšona paruoda, kaidu tautys dali vara aizstuov i iz kaidys tautys dalis byutīni cer pati nūsavierzeit.
Tādiņ pat; vaļdeiba, nauzklausūt tautys vairuokuma ībiļdis, papyldynoj lykumus par homoseksualitatis legalizeišonu, tai tod vaļdeiba poša ir nu homoseksualys vidis, a voi nūsaorientejusīs puorīt pi homoseksuļu dzeivis veida. Saeima, nasadzierdūt i nasaradzūt tautys izmiseigūs protestus, lem par rūbežleiguma sliegšonu ar Krīveju, napasokūt i napīprosūt atkluot viesturiskū patīseibu, taitod deputati puorstuov vaļsts i tautys iņterešu nūdeviejus.
Vaļsts prezidente, byudama itymā omotā ostoņus godus, pabyudama voi puspasauļa vaļstīs, nav ņi ar kuoji īspārusi daudzumdaudzuos Latvejis vītuos, lai sasatyktūs ar sovu tautu, pat, kai iz Bolvu rajona vadeibys vairuokkuortejīm īlyugumīm, vyspuor navieršūt ņimozuokū uzmaneibu, a, nyvle, cītumus apmeklej i klīdz pa vysu pasauli, ka Latvejā cītumnīkīm nav ciļvieceigys dzeivis, lai itū ciļvieceigū dzeivi pyrma bejuse izguodovuse nabagajīm pansionatūs i nūmaļajuos vaļsts pamestīnīs, kurys rodušīs Juos kleisšonys laikā pa pasauli, a na sovys tautys dzeivisgrybys izprasšonā i nūdrūšynuošonā ciļvieceigai dzeivei. Izīt tai, ka prezidentei tyvuoki ir nūzīdznīki…
Voi otkon. Cik stypri nūsavuodejuse ir lauku problema! Zemnīks teik pataisāts par nazkaidu viejagruobsli i ESa pretlatviskuos politikys pakaļdieršku pošam nagrybūt, viņ Latvejis lauku atteisteibys i tautys saglobuošonys politikys (na)veiduotuoju bezdarbeibys dieļ īsvīsts pasauļa izpakaļuotuoju kruoteņā …
Vuodeiguo vara, nuj, vuodeiguo, vuodej tautu i lapnojuos, i puormat tautai, ka tei naatzeist vuodeiguma sevī, ka tei „nanosoj iz rūku” sovu politiskūs vodūņu, ka tei ir konservativa, ka tei nadzīd slavys dzīšmu, a stuosta anikdotus.
Cik labi taidīm vuodeigajīm, kod aizmiersts, ka tautai pīnymts vysu vuodeigū izsvīst māslūs voi sabaruot cyukuom, a na saglobuot …
Sadarbeibā ar Republika.lv