Volūdys vaicuojums / burts “M”

Loba dīna!

Šudiņ parunuosim par par vuordim, kuri atsaškir nu lejslatvīšu i suocās ar burtu m. Pyrma īsaklausit vītu vuordūs, kuri skaņ kai dzīsmeite: Mači, Medni, Madžuli, Mērdzine, Miglinīki, Mežarejis, Myurinīki, Meļderi, Malmona, ari Malmuta, Malnova, Malta, Mežavydi, Myglāni, Murāni, Muorteni, Muotrīne, Muokūņkolns, Muizinīki, Makuži, Murāni, Ari Viļakys vuords nazkod suocēs ar burtu m, jo tū sauce par Marnauzu.

A niu par cytim vuordenim: madaunīks – ir muola pūds madam, a mārga ir meita leigovys godūs,
maut ir peļdēt, a meikstūne – atkusnis,
meit nūzeimej maineit, a metļuks ir tauriņs,
mīlis ir raugs, a motka ir dzejis šketere,
mozgys ir mazgls, a muļtiņs ir flaneļs,
mylyns ir cyuku kaunamais duņcs, ari rūkys dziernovu darbynomais kūks, ari rasna vāza, mylna, ari catūrtuo nūzeime ir vuordam mylyns: tys ir na vysai gudrys cylvāks, tautā par taidim soka „ar maisu systs”.

Muoga ir kuņgis, a meitičs ir donžuns,
meitīs ir maineitīs, a marudzēt ir kavēt,
maule ir rotu rumba, dīmžāl myusu dīnuos tys ir gondreiž izgaisynuojs sovu senejū nūzeimi, a īgivs vaira nīvojūšū.
Merkavuot ir mieginuot, a myudēt ir mauruot,
Meslīņs ir skaidīņs – vīta sātā, kur gatavej molku.
Miļtineica ir myltu putra, a molozejs ir jaunpīns,
Morgs, ari morga ir 2/3 desetinys (apmāram 0,74 nu ha) zemis, a murmuļs ir pīdziers pļuopa, ari cylvāks, kurs naskaidri runoj.
Muoceiba ir spredikis, a Bazneicys svātki Mozuo Muorys dīna, kurus sviņ 8. septembrī, tei ir ari Dīva Muotis Jaunovys Marijis dzimšonys dīna.

A niu par augim, kuru nūsaukumi suocās ar burtu m:
Muškiters ir lelzīdu pelargoneja, a mežoga ir meža uobeļneica,
Mienesnīki ir redisi, a par duorza mirtu latgalīši sauc zylū kuopneiti,
Moruška ir divlopu žagateņa, a muotis zuole ir matuzāle.
Par mīlesteibys kūceņu mes saucam smuordeigū sausserdi.
Maņ, prūtama līta, nav nikaidu zynuotnisku pīruodejumu, bet ari vairuokys sakriteibys pošys dzeivē līcynoj, ka myusu i augu liktini ir sovstarpeji saisteiti i vīns ūtru papyldynoj.

Tymā rudinī, kod nūmyra muns dzedeņš, zīmā nūsola ari mīlesteibys kūceņš (smuordeigais sausserds) babenis puču duorzā. Laikam jau ir kaida īpaša saikne storp zīdim, kūkim i cylvākim. Tys nūzeimej, ka izdorūt poresteibu sovam mozajam bruoļam, tū nagribūt (morali) izdoram ari sev.

Vysu lobu!