Vandali izdemoliejuš vacticeibnīku kopus
Rēzeknē naktī iz 3.juni vandali izdemoliejuš vacticeibnīku kopus. Blieņdari sabūjuojuši kopu kūpenis, izmātuojuš pučis, salauzuši i apguozuš krystus, kai arī daudzus pīminekļus nūlauzuš nu pamatnem. Rēzeknis piļsātys pošvaļdeiba planoj snīgt atbolstu izdemolātūs kopu sakūpšonai.Šudiņ i reit Rēzeknis rajonā pīredzis apmainis nūlyukūs īsarūn Līpuojis rajona kulturys darbinīku delegaceja. Šudiņ gosti apmeklēs Franča Trasuna muzeju “Kolnasāta”, Latgaolys keramikys izstuodi i muzykys instrumentu darbneicu Gaigalovā, kai arī vokorā Gaigalovys kulturys nomā jims daleibu teatra uzvadumā “A.Čaka poētiskuo kopeineica”
7.junī Daugavpilī, tiks atkluots Sirds veseleibys kabinets. Tur apmeklātuojim pīduovuos profilaktiskū izmekliešonu, izgleituošonu par sirds veseleibys veicynuošonu i slimeibu profilaksi, kai ari informēs par kabineta darbeibu.
Leivuonūs, Reigys īlā, pūsmā nu Centra laukuma leidz Ryupnīceibys īlai, suoktū guojieju i ritiņu celeņu rekonstrukcejis dorbu pabeigšonai leigums pagarynuots nu 30.maja da 15.juņam. Pošlaik suokti dorbi īlys ūtramā pusē, kur ītve nav tik plota kai pyrmajā, kas beja ar ritiņu celeņu, leidz ar tū dorbi ritēs mudruok.
8.junī, Jākubpiļa Viesturis muzejā Krustpils pilī nūtiks postmarkys “Krustpils pils” pyrmuos dīnys zeimūguošona. Iz postmarkys attāluota Krustpils pils saulainā vosorys dīnā. Postmarka izdūta serejā “Latvejis piļs”. Tei tapuse Jākubpiļa Viesturis muzeja i VAS “Latvejis Posts” sadarbeibys rezuļtatā Krustpils pils 770 godu jubilejai.
