Valsts prezidentes vizite Daugavpilī
31.majā prezidente īsarass Daugavpilī, kur uzrunuos Daugavpils Universitatē nūteikūšuos konferencis “Policentriskums Latgolā: Daugavpils pīmārs” daleibnīkus i pīsadaleis Strategiskuos analizis komisejis publikacejis “Daugavpils kai atteisteibys ceļveds” atvieršonys svātkūs. Vaira Vīķe-Freiberga pīsadaleis ari dokumentaluos filmys “Ūtruo piļsāta. Daugavpils” pyrmizruodē i tiksīs ar Latgolys pošvaļdeibu, uzjiemiejdarbeibys, akademiskūs apryndu, navaļstiskūs organizaceju i plašsazinis leidzekļu puorstuovim ar mierki apsprīst i veicynuot regionalū atteisteibu itymā nūvodā.Reit Daugavpili apmeklēs Moskovys Centra apgobola prefekts Sergejs Baidakovs i septeni Krīvejis uzjiemieji, Daugavpilī gosti tiksīs ar pošvaļdeibys i vītejim uzjiemiejim, īsapazeis ar leluokajim Daugavpilī eistynojamajim pošvaļdeibys i privatpersonu projektim.
Šudiņ Preiļu slimineicys telpuos atkluos Latgolys regiona Mutis veseleibys centru. Kotrā Latgolas rajonā tuoļuok byus vīns dorba koordinators i diveji uorsti, kuri sasadorbuos ar regionalū centru.
Centra atkluošonā daleibu jims Zūbuorstnīceibys centra direktors Andris Paeglītis. Preiļu slimineicys vaļdis prīkšsādātuojs Juris Urtāns informej, ka pasuokuma laikā nūtiks bārnu zeimiejumu konkursa “Apzeimej zūbu buseņu” dorbu viertiešona.
Šudiņ Rēzeknis rajonā, atpyutys vītā “Rāznys leics”, nūtiks seminars par upju i azaru montuošonu turismam i rekreacejai. Seminarā tūrisma uzjiemieji, pošvaļdeibys i regionalūs institūuceju puorstuovji nu Bolvu, Rēzeknis, Kruoslovys, Daugavpils, Preiļu i Ludzys rajona paredziejuš sprīst par strategiju regiona iudiņa izmontuošonai turismam.
Ministru kabinets vakar apstyprynova nūsacejumus, ar kurim teik izveiduoti Alūksnis i Daugavpils nūvodi. Daugavpils rajona Daugavpils nūvodu veiduos Ambeļu, Bikernīku Demenes, Dubnys, Kalkūnes, Kolupa, Laucesys, Leiksnys, Malinovys, Medumu, Naujenes, Neicgales, Salienas, Skrudalienas, Sventes, Tabores, Vabales, Vecsalienas un Višķu pogosti. Veicūt apriekinus piec 2007.goda 22. maijā dabojamim datim, Daugavpils nūvodā byus apmāram 30 tyukstušys dzeivuotuoji, i nūvoda teritorejis plateiba ir 1877,6 kvadratkilometri. Daugavpils nūvodu veiduojūšojom 19 vītejom pošvaļdeibom paradzāts pīškiert finansejumu 3,8 miljonu latu apmārā.
