Syudzeibys par naslavys ceļšonu
Daugavpils tīsa šudiņ planoj skateit laikroksta “Milion” izdevieja Grigorija Ņemcova syudzeibu pret nedelis avīzi “Seičas” par gūda i naslavys ceļšonu masu sazinis leidzeklī. Vīnlaiceigai atlykta “Seičas ” žurnalistu Albīnas Davidenko i Pāvela Koršenkova pretsyudzeibys skateišona pret Ņemcovu, kuramā žurnalisti apsyudz laikroksta “Milion” izdevieju dažaidūs apvainuojumūs i nacīņys izruodeišonā.Nu šudiņdīnys, slīžu remonta laikā, dzelzceļa pūsmā Vabale-Leiksna maineits viļcīņu kusteibys grafiks. Remonta laikā nakursēs dizeļviļcīns Reiga-Daugavpils ar atīšonys laiku 13:00, kai ari Daugavpils-Reiga ar atīšonys laiku 13:7. Remonts nūtiks ari 17., 18., 19., 23., 24., 25. i 26.aprelī
Kruoslovys viesturis muzejā šudiņ tiks atkluota Latgolys nūvoda školu interešu izgleiteibys vizualuos i lītiškuos muokslys puļceņu daleibnīku izstuodis “Es esmu Latvija” i “Muoksla i muzyka”. Izstuodē byus aptiemejami Kruoslovys, Daugavpils, Rēzeknis, Ludzys i Preiļu rajona interešu puļceņu audziekņu lobuokī dorbi.
Nu šudiņdīnys da 4.majam Preiļu nūvodā nūtiks vidis sakūpšonys tolkys, kuramuos dūme aicynoj īstuodis, uzjāmumus i individualūs sātu īdzeivuotuojus sakūpt sovu īpašumu teritorejis i sakuortuot vidi sovūs īpašumūs. Školu audziekni i īstuožu darbinīki, saskaņojūt grafikus ar SIA “Preiļu saiminīks”, sakūps ari vīnu nu īmeiļuotuokajom piļsātys īdzeivuotuoju pastaigu vītom – Preiļu parku.
