Šudiņ školuotuoju dīna

svineibys Rēzeknis rajona izgleiteibys darbinīkim. Rēzeknis rajona padūmis puorvaļdis Atzineibys roksti tiks pasnīgti tim Rēzeknis rajona pedagogim i speciālistim, kurus sovūs īsnīgumūs apbolvuošonai izvirejuš izgleiteibys īstuodis.

Leivānu nūvoda dūmis izpilddirektors Uldis Skreivers parakstejs reikuojumu ar 4. oktobri uzsuokt apkuris sezonu Leivānu piļsātā. Apkure vakar reitā pyurmajim tyka pīslāgta bārnuduorzam “Rūķeiši”.Pakuopeniski, nedeļis laikā, apkuri pīslēgs arī dzeivūkļūs. Taipoš kai cytuos piļsātuos, arī Leivānūs itūgod apkuris tarifs ir daaudzs, i īdzeivuotuojim tys ir nūsaceits 31, 31 lats par megavatstuņdi, kas ir apmāram par 30% duorguok nikai pārnajā apkuris sezonā.

Rēzeknis piļsātys dūmis Kultūrys puorvaļde izsludynuojus Mozū kultūrys projektu konkursu. Pīsacejumi īsnīdzami da ituo goda 31. oktobram. Konkurss paredz pīšķiert leidzfinansiejumu gon juridiskom,gon fiziskom personom, kuruos pīsoka kultūrys projektus i ituo konkursa ītvorūs tūs realizej Rēzeknē. Projekta rezultātam juobyut sabīdriski nūzeimeigam Rēzeknis piļsātai.

Šudiņ, vīnūs, Leivānūs, Latgalis muokslys i omotnīceibys centra konferenču zālē, 15 Leivānu piļsātys īdzeivuotuojim svineigā ceromonejā tiks izsnīgti Ministru kabineta reikuojumu izroksti par piļsūneibys dabuošonu naturalizācejys kuorteibā. Nu 15 jaunajim pylsūņim vysjaunuokuo ir 12 gadeiguo Anastasija Gončarova, kura pilsūneibu dabuojus kopā ar muoti Aļesju Gončarovu.

Šudiņ Rēzeknē Pleskovys apgobola dīnu laikā Latvejā Veļikije Luki i Novosokoļņiku rajonu kultūrys kolektīvi snīgs rēzeknīšim bezmoksys koncertu, Latgolys radeju informē Rēzeknis piļsātys dūmis sabīdrikū attīceibu nūdaļis vadeituoja Diāna Zirniņa. Pīcūs Nacionālū bīdreibu kultūrys nomā nūtiks Pleskovys apgobola kolektīvu koncerts, kuramā uzastuos apgobolu i Vyskrīvejis konkursu laureāts – tautys muzykys i deju kolektīvs “Raduga”, bārnu folklorys kolektīvs “Radničok” i Novosokoļņiku rajona kultūrys noma daiļradis kolektīvi.