Studenti gatavejās iz tīsys procesu
Nu šudiņdīnys da 29.novembram Rēzeknis augstškolā Juristu dīnuos nūtiks vairuoki gon izgleituojūši, gon izklaidejūši pasuokumi. Šudiņ paradzāta zynuotniski pietnīciskuo konfereņce ”Tīsiskums i ētika tīseibu aizsorgojūšūs īstuožu darbeibā”, piec kurys sekuos oratoru konkurss. Juridiskys situācejis humoristiskuos nūskaņuos, RA tūpūšī juristi izspielies ”Na-Pruota spēlis”. Reit studenti pīzadaleis tīsys procesa improvizacejā, sovukuort aizreit jī varās apmekliet i sekuot ļeidza dorbam policejā i tīsuuos. Nūslāgumā, 29.novembrī paradzāta Juristu dīnu bals.
Augstuokuo tīsa šudiņ rakstveida procesā planoj izskateit kriminallītu, kurā kasācejis syudzeibu īsnīdzs par nažieleigu i vardarbeigu izaturešonūs pret napilngadeigīm nūtīsuotais Baļtinovys kristeiguos specialuos internatškolys bejušais direktors Henriks Logins-Slišāns. Jis īsnīdze kasacejis syudzeibu par 11.oktobra tīsys sprīdumu, saskaņā ar kuru jam pīsprīsta nūsaceita breiveibys atjimšona iz vīnu godu ar tikpat ilgu puorbaudis laiku, taipat ari kompensaceja par moralū aizskuorumu i fiziskom cīsšonom – divim cītušīm kotram pa 500 latu, bet trešajam-1500 latu.
Šudiņ, pulksten 14.00 Jiekabpiļs Viesturis muzejā Krustpils pilī nūtiks dokumentaluos filmys par Latgolys vacticeibnīkim prezentaceja. Filma veiduota ar Latvejis vaļsts finansialū atbolstu. Pasuokumu organizej bīdreiba „Mozuokumtauteibu programma „Zalta komuleits”, tymā pīzadaleis arī mozuokumtauteibu lītu departamenta direktore Irina Vinnika.
Šudiņ Latgolys opgoboltīsa skateis kriminallītu par veirīša slepkaveibu ituo goda pavasarī Dauguopilī, par kū apsyudzeits 1972.godā dzymušais Valērijs O. Aprelī, Daugavpilī, Struodnīku īlā, pi kaidys sātys tyka atrosts 1960.godā dzymušuo veirīša līkis. Tai kai myrušuo pakausī beja saskotama systa briuce, policejis darbinīkim roduos aizdūmys,ka veirīts guojs būjā vardarbeibys dieļ. Deļ tuo nakavejūtīs tyka uzsuokta kriminallīta, kurys gaitā nūzaskaidruoja, ka tūnakt vairoiku cilvāku kompanejā kūpeigys īdzeršonys laikā izacieļs streids, kas puoraudzs kauteņā. Vīnam nu kauteņa daleibnīkim tys izaruodejās tragisks.
Iz Latvejis i Krīvejis rūbežys Terehovys rūbežkontrolis punktā šūreit ryndā gaideja 850 kravys automašynys, bet Grebņevys rūbežkontrolis punktā- 500 automašynys. Ari vakar ryndu garums beja leidzeigs – Terehovā izbraukšonu nu vaļsts gaideja 840, bet Grebnevā – 500 spākroti.
Vakar ap plkst.13.50 Rēzeknis rajona Muokūņkolna pogostā, iz autoceļa Lipuški-Andrupene, 1981.godā dzims veirīts ar automašynu “Audi 100” ībrauce pretejā braukšonys jūslā, kur sazadyure ar automašynu “VAZ 2105”.
Vakar ap plkst.15 Bolvu rajonā, autoceļa Rekava-Škilbāni 1.kilometrā, 1962.gadā dzims verīts ar automašynu “VW Golf” nūbrauce nu ceļa braucamuos dalis i īzatrīce kūkā.