Struoduosim ari sastdiņ

Itūnedeļ sastdiņa, 14.apreļs, byus dorba dīna, jo teik puorcalta nu pyrmudines – 30.apreļa. Reikuojums par dorba dīnu puorcelšonu atsatīc tik iz valsts puorvaldis īstuodem, kū finansej nu valsts budžeta. Pošvaldeibom, komersantim, komercsabīdreibom i organizacejom itys reikuojums ir rekomendūjšs – tom pošom ir tīseibys breivi nūsaceit dorba i atpyutys laiku.

Ludzys rajona padūme paaicynuojuse septeņu pīrūbežys pošvaldeibu puorstuovjus kūpeigai apsprīst problemu lūku, kas saisteits ar garojom krovys automašynu ryndom pīrūbežā
Zylupis nūvoda, Ludzys pilsātys, Briģu, Isnaudys, Cirmys, Malnovys pogostu i Kuorsovys pilsātys pošvaldeibu vadeiba nūruodeis iz problemom, kas ītekmej pogostu cylvāku dzeivi krovys transportleidzekļu i tūs vadeituoju radeitūs naierteibu dēļ. Tiks arī maklāti varamī rysynuojumi, kai ituos problemys mozynuot.

Šudin Daugavpilī, vīsneicā “Hotel Dinaburg”, nūteik seminars meža sovinīkim i cytim interesentim par meža resursu pylnvierteigu izmontuošonu. Konferencē īdūmuots skart vaicuojumus, kas saisteiti ar mežizstruodis atlykumu efektivu savuokšonu i puorstruodi, kai ari diskutēt par jaunuokajom tehnologejom meža biomasys īgivei.

Nu 1.febraļa da 6.apreļam Kruoslovys rajona Aulejis pogostā nu kaidys sātys pogolma nūzogts dziernakmiņs, kuruo diametrs ir 1,7 metri. Cītusī ir kaida 44.godā dzimuse reidzineica, kas sovu sātu, nu kurys pogolma tyka nūzogts dziernakmiņs, izmontoj kai vosorys muoji, cytā laikā īsagrīžūt tymā tik periodiskai.

Rēzeknis dūme nūlieme 50 godu jubilejā gūdynuot Martu Haheli, pasnīdzūt jam Atzineibys rokstu i naudys bolvu. M.Hahelis ir ilggadiejs Tuberkulozis i plaušu slimeibu valsts agenturys Rēzeknis filiala vadeituojs i beja dūmis deputats īprīškejūs divūs dūmis sasaukumūs. Riezeknis sabīdreibai M.Hahelis ir arī pazeistams kai muokslinīks karikaturists. Jau daudzus godus laikrokstā “Rēzeknes Vēstis” jis publicej socialpolitiskys karikaturys ar pseidonimu O’Vaušs.

Laika prognozs šudinei Latgolā: Muokūņains laiks, šaļtim skaidruosīs. Vītom nalels, eislaiceigs leits, slapņs snīgs. Dīnvidrītumu viejš 7-10 metri sekuņdī, brāzmuos 15-16 metri sekuņdī. Maksimaluo gaisa temperatura +4…+7.