Stipendejis Latgolys studentim

Rēzeknis piļsātys dūme vēļ da 1. augustam aicynoj jaunīšus pīsasaceit pošvaļdeibys stipendejis sajimšonai. Iz pošvaļdeibys stipendeju var pretendēt jaunīši, kurī jau studej itaiduos specialitātēs: būvinžiners, uorsts ci pedagogs ar virzeibu eksaktajuos i svešvolūdu zineibuos.

Stipendejis apmārs: pylna laika augstuokuos izgleiteibys programmuos studejūšim – 75%, magistranturā studejūšim – 85%, bet doktoranturā i rezidenturā studejūšim – 100% nu vaļstī nūsaceituos minimaluos mieneša dorba olgys stipendejis pīškieršonys breidī.

Šudiņ Rēzeknē īsarass “Latvejis bārnu fonda” koordinatore Norvegijā, Ārandalē, Anna Elizabete Neas. Golvonais gasteišonys mierkis ir sasatikt ar bārnim, kurim jei ir individualais sponsors. Īsasaistūt “Latvejis Bārnu fonda” darbeibā, Anna Elizabete sameklieja Ārendalē cylvākus, kuri varātum atbaļsteit moznūdrūšynuotūs bārnus Rēzeknis rajonā. Ārendalis sponsori kotru mienesi puorskaita naudu 86 bārnim Rēzeknis rajonā i piļsātā.

Šudiņ Jākubpiļs dūmis Socialūs lītu i veseleibys aizsardzeibys komitejis sēdē lems par vosorys nūmetni bārnim ar eipašom vajadzeibom i bārnim nu tryuceigom saimem. Paradzāts ari izskateit īsnīgumu ar lyugumu pīškiert Jākubpiļs piļsātā dzeivojūšom politiski represātom personom-pensionarim mienešbiletis bezmoksys braukšonai piļsātys maršruta autobusūs naatkareigi nu pensejis apmāra i cytus vaicuojumus.

Šudiņ suokās reflektantu uzjimšona jaunajam 2007./2008. studeju godam Rēzeknis Augstškolā. Nuokušajā studeju godā byus īspieja izavēlēt studejis kaidā nu 38 studeju programmom gon iz videjuos izgleiteibys bāzis – 22 studeju programmuos, gon iz augstuokuos izgleiteibys bāzis – 16 studeju programmuos. Augstškolā pyrmū godu nūtiks uzjimšona trejuos jaunuos studeju programmuos: “Mehatronika”, “Karjerys konsultants” i “Socialais rehabilitatuojs”.

Nu 29. juļa da 4. augustam Rēzeknis rajona Rogovkā nūtiks Latgolys Studentu centra (LgSC) reikuotais starptautiskais izgleitojūši izklaidejūšais seminars jaunīšim „Atzolys”*, kurā pīsadalēs na tikai jaunīši nu Latgolys, bet ari jaunīši nu Krīvejis. Nūmetnis laikā jaunīši varēs dazynuot vaira par latgalīšu volūdu, literaturu, folkloru, Latgolys geograpeju, ekonomiku i kulturysviesturi, kai ari īsapazeis ar ekspedicejis iz Sibiri materialim. Seminars paradzāts jaunīšim vacumā nu 15 da 18 godu, kurim interesej vyss latgaliskais.

Vysu juļa mienesi valsts asinsdonoru centra Latgolys filialē nūteik akceja TU PYRMAIS VARI PALEIDZĒT. Ik godu suokūtīs vosorys sezonai jau tai nalelais donoru skaits samazynoj. Tūmār napīcīšameiba piec ašņa puorlīšuonys namozynuos. Vysi donori teik gaideiti valsts asinsdonoru centra Latgolys filialē 18.novembra īlā 41a (Rēzekne) kotru dorba dīnu nu 8.00 leidz 15.00.