Pyrms 90 godim Latgola apsavīnova ar puorejim Latvejis nūvodim
Rēzeknē šudiņ byus atceris pasuokumi pyrmajam Latgolys Kongresam, kas 1917.goda 26.-27.aprelī Rēzeknē pījieme lāmumu par atsadaleišonu nu Vitebskys gubernis i apsavīnuošonūs ar puorējū Latveju. Pasuokumi suoksīs ar svineigu sanuoksmi Rēzeknis dūmē. Latgolys Kongress beja pyrmais sabīdriski politiskuos dzeivis nūtykums Latgolā ar plašuoku tautys masu pīsadaleišonu. Tūlaik Kongresā pīsadaleja 232 delegati i 118 gosti, tū vadeja vīns nu radzamuokajim atmūdys veicynuotuojim – Fraņcs Trasuns.Vakar kuortejā Varakļuonu piļsātys sēdē īvālāts jauns prīkšsādātuojs Māris Justs, sakarā ar tū, ka īprīškejais prīkšādātuojs Ivars Ikaunīks jau pylda mežziņa pīnuokumus Rēzeknis viersmežnīceibys Viļānu mežnīceibā. Da šam Varakļuonu piļsātys dūmis prīkšsādātuoja pīnuokumus piļdie prīkšsādātuoja vītnīks.
Bīdreibys “Boltuo muoja” realizātuo projekta “Sabīdreibys forums” nūslāgumā šudiņ Leivuonūs nūtiks konference “Grybu! Spieju! Varu! Doru!”, kuramā pīsadaleis vysys daleiborganizacejis i tūs pošvaļdeibu puorstuovi. Projekta “Sabīdreibys forums” mierkis – veicynuot sabīdriskūs centru izveidi Latgolys regionā, aktivizēt regiona navaļstiskū organizaceju i pogostu vītejū iniciativys grupu darbeibu, kai ari sekmēt īdzeivuotuoju pošiniciativu. Projektā pavysam īsaisteitys 16 dažaidys sabīdriskuos organizacejis ci iniciativys grupys nu Preiļu, Bolvu, Rēzeknis, Ludzys, Kruoslovys, Daugavpiļs i Jiekabpiļs rajonim.
Šudiņ vokorā Kruoslovys kulturys nomā nūtiks jaunīšu konkurss “The best”, Latgolys radeju informeja Kruoslovys rajona padūmis sabīdrikūs attīceibu specialiste Zane Cvetkova. Konkurss teik reikuots ar mierki veicynuot jaunīšu organizaceju izveidi pogostūs, dūt jaunīšim īspieji aplīcynuot cīņu pret sovejim pogostim, veicynuot jaunīšus īpasazeitīs ar pogosta viesturis i veiksmeiguokajim pogosta dzeivis breižim, kai ari sekmēt pogostu pozitivuo tāla izveidi.
Rēzeknis Augstškolā šudiņ divūs nūtiks ikgadejais orientiešonuos pasuokums “Kruoka 2007”. Itūgod pasuokuma tēma ir “Latgolvizeja, jeb Eirodziesma Latgalē”. Pasuokums teik organizāts ar mierki vīnkūpus sapulcynuot Latvejis augstuokū vuiceibu īstuožu studentu puorstuovjus i izveiduot ar konkursim i atrakcejom boguotu izklaidejūšu pasuokumu. Spēle nūtiks Rēzeknē, kur komandom nūteiktā kuorteibā juosameklej piļsātā izvītuoti kontrolpunkti i juopylda uzdūtī aizdavumi.
Šudiņ Rēzeknis rajonā tradicionālū Latgolys pūdnīku dīnu turpynuojumā Bieržgalis pogosta kulturys nomā nūtiks tautys lītišķuos muokslys studejis “Rēzeknis apriņķa pūdnīki” ceļojūšuos izstuodis i tautys lītišķuos muokslys meistaru Helēnas i Konstantīna Bindju dorbu izstuodis atkluošona. Bet keramiķu Maijis i Pētera Gailumu darbneicā Ilziskolna pogosta “Jaungailumūs” keramikys cepļa kurynuošona.
