Pyrmais La-La-Dra pasuokums Vabalē
Par gūdu Latvejis vaļsts svātkim pasuokums suocēs ar kūpeigi nūdzīduotu “Dīvs, svietej Latveji!” i ari vysa dīnys programa paguo patriotiski latgaliskā nūskaņā.
Kai Vladislavs Luocs jau 1944.godā raksteja: “…myusim, latgalim jōbyun lapnim uz tū, ka mes asam latvīšu tautas latgaļu calms, jo šys calms ir ar styprom un dziļom saknem. Mes asam izturiejuši godu symtus un naasam atrauti nu latvīšu tautas tikai tuopēc vīn, ka myusūs nav bejis mozvierteibas apziņas par sevi, sovu volūdu… Kas atsasoka nu godu symtu montōjuma, tys nav vairs sverams, jo tys pats ir aizguojs palovōs un kai palovas tod ari cyti tū vērtēs”. Ar itim vuordim suocēs ari pyrmais “La-La-Dra” pasuokums.
Daugavpiļs rajona padūmis kuļturys noma folklorys kūpā “Dyrbyni” itai dīnai beja sagatavejuši karaveiru dzīsmes. Sovys ailis (dzeju) nūlaseja Valentins Lukaševičs i Arturs Uškāns, a publiku īkustynova i leidza dzīduot aicynova “Likteneigais pagrīzīņs iz Vainovu”. Kai muokslinīkim, tai ari vysim skateituojim beja īspieja nūbaudeit ite pat Latgolā (Kruoslovys rajona z/s “Kurmīši”) audzāta čaja ar Aglyunā captu maizeiti i capumim, kluot dalīknūt Preiļu pusē vuoktu madu.
24.novembrī byus nuokamais pasuokums Leiksnā, a tod vēļ četri pasuokumi dažaiduos Daugavpiļs rajona vītuos. Projektu “La-La-Dra” atbolsta Eiropys Savīneiba – Eiropys lauksaimnisteibys virzeibys i garantiju fonds, „Vītejūs reiceibu atteisteiba (LEADER+ veida pasuokumi)”.
