Preiļūs nūtiks “Gaismas svētki eglītei”
Ūtrajā adventē, 9.decembrī, plkst.15 Preiļūs īpreteimā autoūstai nūtiks svātku gaideišonas pasuocīņs “Gaismas svētki eglītei”, kuramā paradzāta eglis lampeņu īdegšona, improvizāta zīmas puorsokas stuosteišona, bārnu i jaunīšu teatra studejas “Haoss” prīšknasums, kai arī kluotasūšū bārnu īsaisteišona rūtaļu īšonā i dzīsmu dzīduošonā.
Šudiņ plkst.17.30 Daugavpils Krīvu nomā tiks reikuoti svātki par gūdu ituo noma simtgadei.Suokūtnieji kuormā atsaroda vacticeibnīku lyugšonu noms, draudzis administraceja i svātdiņes škola. Tāņ Krīvu nomā nūteik vysvysaižuokī pasuocīņi, te teik kūpta i globuota krīvu tautas kultura i tradicejas. Krīvu nomā valda gostļūbesteiba, i tuo durovys vysod ir atdareitys gostim.
Šudiņ Daugavpils universitatē nūtiks rakstnīka Viljama Bleika personeibai i daiļradei velteits zinuotniskais seminars “Viljams Bleiks laikmetu lokos”.Seminarā tiks nūskaiteiti referati par Bleika personeibu, par rakstnīka biografejas mozuok zinuomajim pūsmim, literarū dorbu strukturu i semantiku. Pasuocīņa daleibnīki vysaižu pietejumu kontekstā saleidzinuos Bleiku ar cytim rakstnīkim, runuos par Bleika iztveri Latvejā.
Reit jau deveitū godu pec kuortys Riezeknis augstškolā nūtiks Andrejdīnas literari muzikalais pasuocīņs, kuramā sovu jaunuokū dzeji skaiteis Anna Rancāne, Valentīns Lukaševičs, Linda Kilevica i cyti – vaira i mozuok zinomi, literarajā lauceņā “ībridušī” ceļinīki. Muzikalajā daļā itūgod izastuos da Gunchi. Itugod pasuocīņa kūpsauciejs ir REMONTS – augstškolas, dvieselis, ceļa, naceļa, teksta itt.
