Par veseleibu i celim
Šudiņ Kruoslovys rajona padūmis siežu zalā nūtiks Latgolys planuošonys regiona sadarbeibys komisejis sēde, kuramā sprīss par veseleibys apryupis pakolpuojumu pīejameibu laukūs, kai arī par ES strukturfondu pīsaistis īspiejom 1. i 2. škirys autoceļu remontam Latgolā.Tylta puor Rēzeknis upi remonta laikā da 25. juļam dorba dīnuos byus īrūbežuota satiksme Rēzeknē, Atbreivuošonys alejā. Dorba dīnuos nu reita ostonim, da pīcim vokorā satiksme puor tyltu Atbreivuošonys alejā daleji byus slāgta,- kusteiba nu Latgalys īlys pusis nateik slāgta, bet virzīnī nu pīminekļa “Vīnuoti Latvejai” pusis remontejamū tyltu nabyus īspiejams škārsuot. Planavuots, ka augusta suokuos suoksīs tykta remonts puor Rēzeknis upi Duorzu īlā.
Vakar Kruoslovys rajonā diveju mašynu sadūrsmē cīte seši cylvāki. Vakar sešūs vokorā Kruoslovys rajona Kastulinys pogostā sasaskarē mašyna “Ford Escort” i “Opel Omega”. Ceļu satiksmis nagadejumā cīte i ar dažaidom traumom slimineicā nūguoduoti obeju mašynņu šoperi, kai ari četri pasažiri.
Dzemdeibu i ginekologejis nūdaļā Rēzeknis slimineicys ūtramā stuovā nūteik beidzamī remontdorbi. Jau ziņuots, ka slimineicys ūtramā stuovā byus ni tikai Bārnu i dzemdeibu nūdaļa kai da šam, bet arī Ginekologejis nūdaļa i Gryutnīceibys patalogejis nūdaļa. Sovukuort Kirurgejis nūdaļu īdūmuots paplašynuot.
Paguojušajā nedeļā nūsarysynuo Internacionalais bārnu i jaunīšu folklorys festivals “Pulkā Eimu Pulkā Teku 2007” i konkursā tradiconalos muzykys spielē grupuos -kapelluos- Viļānu folklorys kūpys “Biteitis” kapella īgive pyrmū vītu, tai Latgolys Radejai paviestie vīna nu daleibneicom Aiga Sprindža. Konkursā pīzadalie ari taidys vaļstis kai Turceja, Ungareja, Lītova, Igauneja, Slovakeja i Krīveja
Sabīdreibys veseleibys agenturys vidis veseleibys specialisti Rēzeknis rajona Silmolys pogosta Tiskādu azarā konstatiejuš zilaļģu kluotasameibu uidiņstilpnē, leidz ar tū mauduotīs itymā azarā nav īsokams.
