Ontonam Slišānam Dzejis dīnu bolva par izcilu davumu regionalajā literaturā
Ūtartdiņ, 11. septembrī, pi Raiņa pīminiekļa Esplanadē (Reigā) nūtyka Dzejis dīnu pasuokums, kura laikā tyka pasnīgtys tradicionaluos Latvejis Rakstnīku savīneibys Dzejis dīnu bolvys.
Dzejis dīnu bolva ir dybynuota 1995. godā, kab itai atbaļsteitu muokslinīciski nūzeimeigu originaldzeju i atdzeju. Bolvu pasnīdz autorim, kuru dzejūļu (voi dzeivūļu) kruojums ir izguojs laikā nu paguojušuo goda septembra da ituo goda septembram. Kruojumus skaita žūreja i pīškir bolvys par lobuokajim originaldzejis i atdzejis kruojumim.
Itūgod Dzejis dīnu bolvu par izcilu davumu regionalajā literaturā sajēme latgalīšu dzejnīks Ontons Slišāns (par kruojumu “Tītupats”).
Par goda lobuokū originaldzejis kruojumu tyka atzeita Ingys Gailis gruomota “Kūku Marija”, bolvu par atdzeju sajēme Leons Brīds (Fernandu Pesoa “Metafiziskais inženīrs” i Eužeio Montale “Cylvāki ar murdim”).
Žūrejis komisejā beja dzejnīki Ronalds Brīds i Ērika Bierzeņa, literaturzynuotneica Janina Kursīte, Rakstinīku savīneibys prīšksādātuoja Īva Kolmane i paguojušuo goda Dzejis dīnu bolvys īgivieja Liāna Langa.
Laureati sajēme bolvys – metala gruomotys, kū taisiejs muokslinīks Aldis Kaugars.
Itūgod konkursam beja pīsaceitys divpadsmit dzejis i treis atdzejis gruomotys. Tymā skaitā – treis gruomotys latgaliski.