Nafta Daugovā

Pi Latvejis – Boltkrīvejis rūbežys šūreit tyka apsekuots Daugovys iudiņs un natyka konstatātys pazeimis, ka Boltkrīvejā izplyudušuo saļarka byutum pīsatyvuojus Latvejai. Tai informej Vaļsts vidis dīnesta direktors Vilis Avotiņš. Tūmār jis vīnlaikys pībylda, ka iudiņa puorbaude veļ turpynuosīs.

Vaļsts gunsdzieseibys un gluobšonys dīnesta, Zemissardzis un Rūbežsardis puorstuovim vakar naizadeve uzstuodeit jiurys bonys, lai aizturātum izplyudušū saļarku. Lai gon naftys produktu voda pleisuma dieļ Boltkrīvejā nūplyudušys apmāram 100 tonnys saļarkys, boltkrīvu specialistim leluokū daļu pīsuorņuojuma izadevs aizturēt un savuokt. Tai vakar sasatikšonā Latvejis – Boltkrīvejis pīrūbežā atzyna īsaroduš Bolkrīvejis vaļdeibys omotpersonys.

Latvejā šudiņ jau 6.godu piec kuortys suoksīs Juristu dīnys, kuruos aicynuts pīsadaleit sevkurs interesents. Rēzeknis Augstškolā šudiņ Juristu dīnu ītvorūs nūtiks studentu politiskī lasejumi par temu “Latvejis politiskuos sistemys prakse”. Lasejumus vadeis Rēzeknis Augstškolys docents Jurs Muižnieks.

Rēzeknē jau vairuokus godus teik realizāta vierīneiga iudiņssaimnīceibys sakuortuošonys programa ar kūpejū vierteibu 14 miļjoni eiro. Projekts paradz uzlobot iudiņa apguodis un kanalizacejis pakolpuojumus, nūdrūšynuot dzaramuo iudiņa atbiļsteibu Eiropys Savīneibys un Latvejis Republikys praseibom, kai ari sakuortuot nūtakiudiņu atteiriešonys sistemu un realizēt nauzskaiteituo iudiņa patieriņa samozynuošonys programu.

Bolvūs šudiņ suocās putnu būreišu gatavuošonys akceja ar nūsaukumu “Gaidom putnus Bolvūs”. pīsadaleit akcejā teik aicynuoti vysi lelī un mozī piļsātys īdzeivuotuoji. Putnu būreišus var taiseit sātā un vysu nedeļu nest iz Omotnīku dorbneicu “Luoču duorzā”. Akceja nūsaslēgs sastdiņ, 31.martā.