Ministrs Latgolā pasnīgs Zaļū sertifikatu

Šudiņ (26.07.2007.) vidis ministrs Raimonds Vējonis apmeklies Kruoslovys rajona zemnīku saimisteibu “Klajumi” i pasnīgs “Zaļū sertifikatu”. Zyrgu sātys “Klajumi” saimnīki ir izveidovuš atpyutys īspiejys tim, kam pateik zyrgi – izjuodis, puorguojīni zyrga mugurā, reitterapeja, kai ari pīduovoj cytus lauku turisma lobumus. “Zaļais sertifikats” ir sova veida nacionalais “eko sertifikats”, kas teik pīškierts lauku turisma saimisteibom i aplīcynoj, ka attīceiguo atpyutys vīta ir īkuortuota, saudzejūt vidi, saglobuojūt ainovys i biologiskū sovpatneibu, kai ari īvārojūt vītejuos tradicejis.

Šudin Rēzeknis dzeivuotuoji bez moksys varies atsabreivuot nu nūlītuotajom i saimnīceibā vaira naizmontojamom elektroīkuortom. Rēzeknīši varies nūdūt soltaunīkus, trauku i velis mozguojamuos mašynys, mikroviļņu kruosnis, fenus, putekļu syuciejus, telefonus i cytys elektroprecis. Akcejis laikā Rēzeknes dzeivuotuoji nūlītuotuos elektroīkuortas varies nūdūt 12 pylsātys vītuos, kur autotransports izakavies 30 minutus.

Projekta “Pasauļs sīna” autori šudin Rudzātu pogosta padūmē iz tikšonūs aicynoj pogosta dzeivuotuojus i vysus cytus interesentus, kab suplokumā pastuosteitu par projektu i atbildeitu iz dzeivuotuojus interesejūšim vaicuojumim. Piec treis mienešu komunikacejis projektam jau registriejušīs vaira kai 4 tyukstušys atbalsteituoju.

Šudin Leivuonu nūvodu pīredzis apmainis vizitē apmeklies Līpuojis rajona pošvaldeibu puorstuovi. Leivuonu nūvoda dūmis deputati daleisīs pīredzē par nūvoda izveidi. Līpuojis rajona pošvaldeibu puorstuovi paradziejuši apmekliet Rūžupis pogosta puorvaldi i īsapazeit ar tuos dorbu, taipoš planuojuši apmekliet Leivuonu Inženertehnologiju i inovaciju centru, Latgolys Muokslys i omotnīceibys centru i SIA “Lettglas” stykla muzeju.

Šudin Daugavpils dūmis siedē lems par atbolstu projektam “Muoksla bez rūbežom – puorrūbežu kulturys industrejis veicynuošona Marka Šagāla i Marka Rotko daiļradis kontekstā”. Projektā paradzāts izstruoduot ilgtspiejeigys sadarbeibys modeli kulturys apmaiņā storp Daugavpili i Vitebsku, organiziet Šagāla dorbu izstuodi Daugavpilī, zynuotniskūs skaitejumus Vitebskā.

Itūreit drusku pīaugušys kravys mašynu ryndys iz Latvejis i Krīvejis rūbežys Grebņevys rūbežkontrolis punktā, bet Terehovā tuos ir sarukušas. Itūreit Terehovā rynda gaideja 400 kravys mašynu, bet vakar – 630 spākroti. Sovukuort Grebņevā itūreit ryndā gaideja 580 mašynys, bet vakar – 555 mašynys.

Laika prognozs šudinei Latgolā. Muokūņains laiks, dīnā skaidruosīs, nalels, eislaiceigs leits. Zīmeļrītumu viejs 5-10 metri sekuņdī. Maksimaluo gaisa temperatura dīnā +18 +23.