Latgolys turisma atteisteibys virzīni
Reit, 12.junī, Eiropys regionaluo turisma instituts īlyudz vysus interesentus iz Baltejis azaru zemis projekta nūslādzūšū seminaru, kuramā planuots izvertēt padareitū i īzeimēt jaunus virzīņus Latgolys i Baltejis Azaru zemis turisma atteisteibā. Nūslādzūšajā seminarā daleibu jims vairuoki pazeistami lektori, kuri informēs par aktualitatem Latvejis turismā.Šudiņ pl.16:00 apgoboltīsā nūlaseis sprīdumu Bolvu uzjiemieja Alberta Brīža slepkaveibys lītā, kuramā apsyudzātys četrys personys. Prokurors par Bolvu uzjiemieja Alberta Brīža slepkaveibu tīsojamajim pīpraseja pīmāruot realu cītumstruopi iz 10 i 11 godim.
Daugavpils Saskanis pamatškolys 9.klasis absolvents Kristians Samušs uzruodeja vīnu nu lobuokajim sporta normativu rezultatim sova vacuma grupā “DRUVYS Spākolūta līgā”, kurā pīsadalie pīcys Latvejis regionu školys. Jis tyka apbolvuots pārnū sastdiņ – izlaiduma laikā.
Vaļsts kulturkapitala fonds ir atbaļstejs jaunīšu nūmetnis projektu “Izgleitojūša tradīceju vosorys škola”, kū izstruoduoja i organizej Rēzeknis rajona padūmis Izgleiteibys puorvaļde. Nūmetne nūteik nu šudiņdīnys leidz 15.juņam Rēzeknis rajona Tiskādūs. Tymā daleibu jam vydsškolys vacuma jaunīši gon ar dziļuokom zynuošonom, gon bez prīkšzinuošonom folklorā i latviskajuos tradicejuos – kai atzeist Rēzeknis rajona padūmis Izgleiteibys puorvaļdis jaunatnis dorba specialiste Inga Drele, golvonais ir gribiešona apgiut jaunys zynuošonys i prasmis.
Šudiņ Bolvūs suoksīs divejis vosorys nūmetnis školānim – “Biteite 2007” i “Drūšsirds”. Nūmentē “Biteite 2007” planuotys ni tikai dažaidys muokslys nūdarbiebys, bet ari vīnys dīnys ekskurseja pa Vidzemi, itei nūmetne kūpā puļcej 36 bārnus. Bet sporta i turisma nūmetnē “Drūšsirds” 15 bārnus ar dažaidim natradicionalim sporta veidim īsaisteis fiziskajuos aktivitatēs, kai ari vuiceisīs apgleznuošonys tehniku ar kruosu pyušamajim balonenim.
