Latgolys studentu tikšonuos ar IZM

Ituo goda 23.oktobrī LR Izgleiteibys i Zynuotnis ministreja pi seve iz sasatikšonu beja aicynovuse bīdreibys „Latgolys Studentu centrs” (LgSC) puorstuovus. Piec garys diskusejis (2,5 stuņžu garumā) obejis pusis vysleidza palyka pi sova redzīņa, kaidai vajadzātu byut reiceibai saisteibā ar Vaļsts volūdys lykuma 3.panta 4.apakšpunktu: „Vaļsts nūdrūšynoj latgalīšu rokstu volūdys kai viesturiska latvīšu volūdys paveida saglobuošonu, aizsardzeibu i atteisteibu”.

Ministreju puorstuovēja Zaiga Sneibe (IZM Volūdys departamenta direktora pīnuokumu piļdeituoja), Vineta Ernstsone (Vaļsts volūdys atteisteibys nūdalis vadeituoja) i Ināra Ostrovska (Izgleiteibys i zynuotnis ministris padūmneica); nu LgSC vaļdis iz sasatikšonu īsaroda Ilze Sperga, Mareks Gabrišs i Jurs Viļums.

IZM skaita, ka Vaļsts volūdys lykumā nūsaceituos normys teik pylnvierteigi piļdeitys i satraukumam par latgalīšu volūdys pagaisšonu nav nikaida pamata, partū ka ministrejis reiceibā nav pīruodejumu par pretejū. Latgalīšu volūdu lītojūt saimē i sabīdreibā, a piec plašuoka rokstu volūdys lītuojuma, par pīmāru, vaļsts puorvaļdē nav nikaidys vajadzeibys, tū ari napīļaun Vaļsts volūdys lykums, kas latgalīšu rokstu volūdu definej kai latvīšu volūdys viesturiskū paveidu – lītojamu atseviškuos situacejuos, na paraleli latvīšu literārajai volūdai. Tyka atzeits, ka latgalīšu volūdys saglobuošonai ir gona ar juos zynuotnisku izpieti, a par juos prestižu ir juoguodoj vysupyrma saimē.

I.Ostrovska aicynova īsnīgt pīruodiejumus par latgalīšu volūdys diskriminaceju, ka gadīnī taidi ir sastūpami. Jei ari paude puorlīceibu, ka daudzuos Latgolys školuos latgalīšu volūda teik vuiceita kai fakultativs prīškmats, koč i navarēja pīduovuot konkretu školu sarokstu. V.Ernstsone pīkryta, ka vaļstī byutu vajadzeigs uzlobuot „tolerancis aspektu” pret latgalīšu volūdu, guodojūt par sabīdreibys vyspuorejuos tolerancis veicynuošonu. Z.Sneibe sūleja iz prīšku vaira sasazynuot ar LgSC puorstuovim.

Koč kūpumā tyka atzeits, ka ūtra rokstu tradiceja ir latvīšu tautys bagateiba i par jū byutu vajadzeigs vaira informacejis kai školā, tai sabīdreibā i medejūs, nikuo konkreta ministreja navarūte pīduovuot – kai tikai aicynuot latgalīšu sabīdriskuos organizacejis izruodeit leluoku iniciativu i īsnīgt sovus prīšklykumus, par pīmāru, Vaļsts volūdys politikys programai, Latgolys izgleiteibys programai, Myužizgleiteibys programai i cytom. Vēļ IZM puorstuovi īsaceja apsasprīst ar Latgolys pošvaļdeibom par latgalīšu volūdys saglobuošonys i atteisteibys veicynuošonu i puorskaitēja cytu vaļsts strukturu pakļauteibā asūšuos institucejis, kur varātu vaicuot piec atbolsta latgalīšu volūdai.

Kūpumā sarunā tyka atzeits, ka latgalīšu volūdys saglobuošona i atteisteibys veicynuošona ir vajadzeiga, kai ari teik atbaļsteita, koč nav nivīnys strukturys, kam tys byutu teišais aizdavums i kas par tū byutu atbiļdeiga.

Atguodynuosim, ka ituo goda 1.junī LgSC nūsyutēja Ministru prezidentam viestuli ar aicynuojumu nūsaceit vīnu vaļsts instituceju, kas byutu atbiļdeiga par Volūdys lykuma 3.panta 4.punkta izpiļdi, kai ari izstruoduot ilgtermeņa programu ar reiceibys planu vairuokim godim. Taipat ir nūtykuse LgSC puorstuovu sasatikšona ar Tīslītu ministru Gaidi Bērziņu, kas izsaceja atbolstu regionalūs identitašu saglobuošonai i atzyna, ka vajadzeiga atseviška struktura, kas veidoj dialogu ar latgalīšim i koordinej sadarbeibu ar vaļsti. Sovukuort 20.julī Ministru prezidents aicynuoja IZM vadeibā sataiseit dorba grupu, kuo aizdavums ir snīgt atbiļdi iz vaicuojumu par latgalīšu volūdys niulenejū stuovūkli i nuokūtnis vizejom, pīaicynojūt atbiļdeiguos vaļsts institucejis i sabīdryskuos organizacejis. Leidz 1.novembram dorba grupai napīcīšams sagatavēt vajadzeigūs prīšklykumus. Dīvamžāļ, juosoka, ka nivīna sabīdriskuo organizaceja iz nūsauktuos dorba grupys saīšonom nav aicynuota.

LgSC viereigi sekuos tuoļuokajai nūtykumu atteisteibai.

Latgolys Studentu centrs
lgsc@latgale.lv
www.lgsc.latgale.lv