Latgolys Radejis zinis (9.11.2007.)
Šudiņ i svātdiņ, 11. novembrī, Daugavpilī nūtiks Luočplieša dīnai veļteiti pasuokumi. Šudiņ Muokslys salonā “Māra” plkst. 11 tiks atkluota Luočplieša dīnai velteita sīnys avīžu izstuode. Divejis stuņdis vāluok Vīneibys laukumā suoksīs Luočplieša dīnai velteits pasuokums ”Gods kalpot Latvijai!”. Pasuokumā Zemissardzis 34. artilērejis bataljona puorstuovji demonstrēs bruņuojumu i kaujis tehniku – mīnmetiejus i lelgabalus. Pasuokumā byus apskotams arī Valsts rūbežsardzis Daugavpils puorvaļdis bruņuojums, tehnika,specapreikuojums, mudruos reaģiešonys vīneibys paraugdemonstriejumi i kinologu darbeibys paraugdemonstriejumi.
Šudiņ trejuos stuņdēs Kruoslovā, pi pīminekļa “Muote Latgale raud”, nūtiks Luočplieša dīnai velteits svineigs pasuokums “Tas skarbais varoņlaiks”. Pasuokumā paradzāts pīmiņis breids, kuramā Kruoslovys muoceibu īstuožu audzēkņim tiks stuosteits par Luočplieša dīnu, i pīmiņis plāksnis “Nepaej garām, apstājies” atkluošona. Pīsadaleit pasuokumā uzaicynuoti arī Saeimys deputāti Gunārs Upenieks i Pēteris Tabūns.
Ludzys rajona sporta školys kompleksā “Vuorpa” šudiņ nūtiks Luočplieša dīnai veļteitys sporta sacenseibys školānim. Sacenseibys “Kurais stypruoks?” nūtiks treis apakšgrupuos – 6.-7.klasis, 8.-9. klasis un 10.-12.klasis.”Stypruokī” tiks nūskaidruoti taiduos disciplīnuos kai vīglatlētikys stafete, striča vilkšona, volejbols un basketbols.
Šudiņ Jākubpiļs dūmē nūtiks sanuoksme, kuramā tiks apsprīsta Jākubpils atteisteibys integrātuo programma. Tagad Jākubpilī rit dorbs pi piļsātys integrātuos atteisteibys programmys aktualizācejis atbylstūši Reģionāluos attesteibys i pošvaļdeibu lītu ministrejis vadlīnejom par pošvaļdeibu integrātū attesteibys programmu izstruodi.
Lai sprīstu par byvnīceibys speciālistu sagatavuošonu, šudiņ vīnūs Daugavpils dūmis telpuos tiksīs RTU, Byuvnīku asociācejis i pošvaļdeibys puorstuovji. Gotovojūtīs jaunys studeju programmys auokšonai, RTU Daugavpils filiālē grib informēt i īpazeistynuot ar studeju kursa saturu Daugavpils i Daugavpils nūvoda uzjiemiejus, firmys i byuvnīceibys organizācejis.
Šudiņ vīsneicā “Hotel Ērgļi” vuiceibu kursa “Voi es varu ļūbeit?” nūslāgumā tiks pasnīgtys aplīceibys 18 Latgalis speciālistim, kurī turpmuok snīgs zynuošonys i atbolstu seksualitātis vaicuojumūs cylvākim ar gareiguos atteisteibys trauciejumim.