Latgolys Radejis zinis (25.10.2007.)
Šudiņ diveju dīnu vizeitē Daugavpilī īsarass Igaunejis Republikys uorkuortejais i pylnvaruotais viestnīks Jāks Jērits. Viestnīks tiksīs ar Daugavpils uzjiemiejim, apmeklēs AS “Daugavpils lokomotīvju remonta rūpnīca”, kur īsapazeis ar uzjāmuma dorbu, i Daugavpils Universitāti. Pīvakarē jam paradzāta ekskurseja pa Daugavpili.Augstuokuos tīsys Civillītu tīsu palāta šudiņ paredziejuse pasludynuot sprīdumu SIA “Akvarius” praseibys lītā par moksuotnaspiejeigū AS “Balvu enerģija” par 188 611 latu poruoda pīdziņu. Itymā lītā trešuos personys statusā pīaicynuota Balvu piļsātys dūme, deļ tuo ka “Balvu enerģija” sovulaik bejuse pošvaļdeibys uzjāmums.
Šudiņ Daugavpils dūmis kuortejā pošvaļdeibys sēdē deputati lems par sova jaunuo kolegys Grigorija Ņemcova (“Jaunais centrs”) īvieliešonu pastuoveigajuos komitejuos. Ar pozitivu deputatu bolsuojumu Ņemcovs ījims sova prīkšteča Jevgēnija Vladimirova vītu finanšu i sociālūs lītu komitejā.
Šudiņ Kruoslovys jaunīšu kluba “Krasts” ustobuos nūtiks Kruoslovys rajona 5. Jaunatnis konference. Konferencē Kruoslovys rajona jaunatnis padūme snīgs puorskotu par goda laikā paveiktū, analizēs Kruoslovys rajona jaunīšu iniciatīvu grupu i klubu dorbu, vēļēs jaunū Kruoslovys rajona jaunatnis padūmi.
Šudiņ divuos stuņdēs Rēzeknis dūmē nūtiks Jaunīšu dūmis, pošpuorvalžu puorstuovju i piļsātys dūmis darbinīku plenārdiskuseja “Rēzekne – jauniešiem draudzīga pilsēta”. Plenārdiskusejis nūslāgumā Rēzeknis dūmis darbinīkim tiks uzduovynuotys fotokonkursa “Zoom-In” uzvarātuoju potograpejis. Jau ziņuots, ka da 26. oktobram nūteik “Jaunatnis demokratejas nedeļa Riezeknis dūmē”. Pasuokums teik organizāts ar mierķi veicinuot pylsātas jaunīšu leidzdaleibu sabīdriskajūs procesūs, radeit tīšu saikni storp Jaunīšu dūmis, školānu/studentu pošpuorvalžu puorstuovim i Riezeknis pylsātas dūmis vadeibu i nūdaļu specialistim.
Šudiņ Daugavpils Universitātē nūtiks Informācejis dīna par Latvejis pylsūneibu. Informācejis dīnā DU bibliotekys vadeituoja Anita Mukāne īpazeistynuos interesentus ar DU bibliotekys jaunīguvumu iztuodi, bet Naturalizācejis Puorvaļdis Daugavpils reģionāluos nūdaļis vacuokuo referente Ināra Baranovska snīgs informāceju i konsultacejis par Latvejis pylsūneibys dabuošonys veidim, vajadzeigajim dokumentim i naturalizācejis puorbaudejumim.
Nu šudiņdīnys SIA “Jākubpiļa autobusu parks” par pīcim santimim paaugstynoj autobusa biļešu cenys rajona maršrutūs. Sovukuort biļete da Reigys SIA “Jākubpiļa autobusu parks” autobusūs nu Ls 1,90 daaugs da Ls 2,25. Nu 1. novembra Jākubpilī pasalelynuos arei mienešbiļešu cena piļsātys maršruta autobusūs.
