Latgolys Radejis zinis (2.11.2007.)
![](https://lpr.gov.lv/wp-content/uploads/2005/dezuratteli/79.jpg)
Vairuoki Rēzeknis uzjiemieji ir atsasaukuš pošvaļdeibys aicynuojumam novembra suokumā pīsadaleit Lobūs dorbu nedeļā, taidejaidi aplīcynojūt sovu gribiešonu atbaļsteit dažaidys sabīdriskuos i sociāluos aktivitātis. Kai informē Rēzeknis piļsātys dūmis sabīdriskū attīceibu nūdaļis vadeituoja Diāna Zirniņa, lobū dorbu nedeļa Rēzeknē simboliski tiks atkluota pyrmudin, 5.novembrī divuos stuņdēs ar pasuokumu Rēzeknis slimineicys Bārnu nūdaļā.
Kab padareitum sadzeivis atkrytumu izvešonu lobuoku i Leivānu dzeivuotuojum byutum izvēlis īspiejis, nu 1. novembra SIA “Leivānu dzeivūkļu i komunāluo saimnīceiba” uzsuokuse atkrytumu savuokšonu markētūs plastmasys maisūs nu privātsātom piec vīnuota grafika. Paraleli tiks saglobuota arī konteineru sistema. Daudzdzeivūkļu sātu īmeitnīkim atkrytumu savuokšonā nikas nasamaina.
Kab mazynuotu traģiskuo nūtykuma sekys i nūdrūšynuotum normālu Daugavpils pyrmsškolys izgleiteibys īstuodis dorbu, ar tuos darbinīkim i audziekņim apmāram mienesi struoduos psihologi. Kai ziņuojem, paguojušū ūtardiņ Daugavpilī, kaidā pyrmsškolys izgleiteibys īstuodē darbojūtīs ap automātiskū veļis kaltātuoju-gludinuotuoju traumys dabuo muote i meita, jom konstatāti rūku lyuzumi i apdagumi.
Nu šudiņdīnys da 4. novembram Reigā i Latvejā nūteik tautys muzykys festivāls “Dzeivuo muzyka 2007”, īpašu uzmaneibu veļtejūt ermoņiku spēlei. Tautys muzykys festivāla mierķs ir apzynuot sasaglobuojušuos tautys muziciešonys tradīcejis i īpašu uzmanību pīvērst izzyudūšajom.Festivālā pīsadaleis arī myusu pošu Medņevas kapela, Salnavas kapela, vecmeistari no Kruoslovas, Balvu rajonim, kai arī gosti nu Lītovys i Igaunejis
Daugavpils Muzykys vydusškolā turpynojās X Starptautiskais akardeona muzykys festivāls. Festivālā daleibu jam akardionisti i akardionistu ansambļi nu Latvejis, Lītuvys, Boltkrīvejis, Krīvejis, Vuocejis i Holandis. Kai festivāla vāžnuokī gosti Daugavpils skateituojus prīcēs populārais duets nu Krīvejis “Bajan Mix”.