Latgolys Radejis zinis (13.12.2007.)
Itymā mienesī nūdybynuota naformala Varakļānu nūvoda atbolsta grupa, kurys rezoluceju jau šūnedeļ planuots īsnīgt regionaluos i pošvaļdeibu lītu ministram Edgaram Zālānam. Grupys daleibnīki praseis Zālānu izvierteit rodušūs situaceju i atbaļsteit Varakļānu nūvoda izveidi kūpā ar Dekšāru pogostu, deļtuo ka tai tyktu jimtys vārā īdzeivoituoju vieļmes, kulturviesturyskuos, geogrāfiskuos i ekanomiskuos saitys.Šudiņ dorbu suoks komiseja, kas pījims eksplautacejā Lūznovys cīma atjaunoituos syltumtrasis. Byuvdorbu laikā tyka rekonstruāti orejī cimota siltumteikli, kas beja fiziski nūzalītuojuš. Tūs uztureišonys izmoksys bejušys nasamiereigi lelys. Savukuort jaunī syltumteikly snīgs īspieju samozynoit syltuma zudumu tymūs. Rekonstrukcejis dorbus veice Rēzeknis uzjāmums SIA “Lieta plus”. Kūpejuos projekta izmoksys ir 93 000 latu.
Šudiņ Daugavpilī suoksīs Boltkrīvejis piļsātys Vitebskys pošvaļdeibys porstovu i uzjāmumu delegacejis vizite. Šudiņ gosti plānuošs tiktīs ar Dauguopiļs dūmis prīšksādātuojis vītneici Eleonoru Kleščinsku, apmekleis Daugavpiļs Izgleiteibys puorvaļdi, Sporta puorvaļdi, Turisma i informacejis centru, Daugovpiļs regionalū slimineicu, īsapazeis ar tuos darbeibu, kai ari Etniskajā centrā pīzadaleis ”Uzjāmumu kontaktu biržā”.
Šūvokor tiks īdagta golvonuo Jākubpiļs Zīmyssvātku egle. Zīmyssvātku egles īdegšona Vacpiļsātys laukumā paradzāta plkst.17.00. Pasuokumā pīsadaleis Jākubpiļs dūmis prīšksādātuojs Leonīds Salcevičs, savukuort ar Zīmyssvātku īskanis programmu kluotasūšūs prīceis dzīdoituoja Olga Rajecka.
Šudiņ viziti Daugovpilī i Rēzeknē nūslādz ASV viestnīceibys padūmnīks politiskajūs vaicuojumūs Less Džonstons. Sovā vizitē Latgolā amerikāņu diplomāts lelu uzmaneibu paredziejs veļteit vacticeibys īpazeišonai. Jis paredzies tiktīs ar Latvejis Vacticeibnīku bazneicys padūmis prīšksādātuoju, tāvu Aleksandru Žilko, tiktīs ar vacticeibnīku draudžu porstovim. Kai arī apmekleit lyugšonu nomus, kopsātys i bazņeicys.
Šudiņ atkluos Rēzeknis augstškolys – Ideju gastneicu, kas pīduovois pakolpuojumus jaunu, tehnologisku uzjāmumu atbolstam i atsarassīs Moskovys īlā 22. Ideju gastneicā paradzātys 10 labi apreikoitys telpys i citi uzjiemiejdarbeibys atbolsta pakolpuojumi jaunīm uzjiemiejim, kuru dybynoituoji ir vacoikū kursu studenti i docātuoji. Inkubatora atkluošonys ītvorā nu plkst.14.00 da 17.00 nūtiks lobdareibys akceja ”Jaunais Rēzeknis uzjiemiejs”, ļaunūt bārnim īzajust biznesmeņu dzeivē – jī reikuos sovu rūkdorbu izstuodi i izpuordūšonu.
Jākubpiļī Zīmyssvātku nūformiejumam pošvaļdeiba izlītuos 14 tyukst. latu. Mineitū naudys summu planoits iztiereit egleišu izvītoišonai, jaunu spuļdzeišu virteņu īguodei, iluminacejis izvītoišonai piļsātā, kai ari jaunu gaismys elementu īguodei piļsātys svātku nūformiejumam.
