Latgolys radejis zinis (13.11.2007.)
Daugavpiļs universitatē (DU) šudiņ turpynoj dorbuotīs kongress “Latgolys sabīdreiba atteisteibys lūkūs: juridiskī, volūdys, politikis, sociologiskī, viesturiskī (dzeivysstuostu) aspekti”. Dorba kuorteibā īkļauts 21 referats par vaicojumim, kas skar dažaidus Austrumlatvejis atteisteibys aspektus. Sekcejis dorbā pīsadalēs zynuotnīki nu DU, Reigys pedagogejis i izgleiteibys vadeibys augstškolys, Rēzeknis Augstškolys, Ventspils augstškolys, kai ari gosti nu Glāzgovas universitātes (Lelbritaneja).
Rēzeknis 5. vydsškollys 3.klasis školānim nūtiks vuiceibu stunde “Mana pirmā pase”, kū vadēs Pilsonības un migrācijas lietu pārvaldes (PMLP) un Valsts robežsardzes darbinīki.
Pasuokuma gaitā bārni veiduos zeimejumus ar nūsaukumu ”Mana pirmā pase”. PMLP statistikas dati
līcynoj, ka Rēzeknis rajonā ar dereigu pasi dzeivoj 201 bārns, kurs sasnīdzs deviņu godu vacumu.
Paguojušajā dīnnaktē samozynovušuos kravys automašinu ryndys iz Latvejis- Krīvejis rūbežys. Terehovā šūreit gaideja 960 kravys automašinys, kas ir par 10 muozuok nakai vakar nu reita. Grebņovā izbraukšonu nu vaļsts gaideja 240 spākroti, kas ir par 20 muozuok nakai pyrmudin.
Šudiņ pl.16:00 “AAC biroja” talpuos Jākubpiļē nūtiks autocentra byuvnīceibys Kļavu īlā 9 projekta prezentaceja. Autocentru paradzāts byuvēt divejūs stuovūs. Informativī materiali par byuvnīceibys īceri byus apskotami Jākubpiļs dūmis telpuos Breiveibys īlā 120 da 30.novembram.
Aivadeitajā nedelī aizdūmuos par ļaunpruoteigu dadzynuošonu aizturātī aizdadzynuovuši atpyutys muojenis kempingā “Zirga smaids” Nirzys pogosta Raipolē. Tuos da paguojušuo goda juļam pīdereja bejušajam Zilupis mēram Anatolijam Lapikam, bet niu tuo eipašnīce i valdis prīkšsādātuoja ir juo sīva Anna Lapika. 7.novembrī ONAP darbinīki, puorbaudūt īgiutū informaceju, aizturieja pīcus nūzīdzeigys grupys daleibnīkus. Personys, nu kurom sajimts pasyutejums nūdadzinuot muojenis, tīk turātys aizdūmuos par ļaunpruoteiga dīnasta stuovūkļa izmontuošonu, kukuļjimšonu i kukuļdūšonu.
Šudiņ pl.18.00 Līpuojis puorstuovnīceibā Reigā paradzāta Kurzemis, Vidzemis i Latgolys studentu tikšonuos. Oktobrī puortuovnīceibā gasteja “Latgolys Studentu centra” puortuovi i īrusynuova tiktīs ar studentim – līpuojnīkim i sabīdriskuos organizacejis “Cēsinieku klubs” jaunīšu sekcejis daleibnīkim, kab puorrunuotu kotrys kūpys aktulūs vaicojumus i darbeibys principus.
Muokūņains laiks. Breižim snīgs. Celi byus slydoni. Dīnā austrumu, dīnvidaustrumu viejs 4-9 m/s. Gaisa temperatura dīnā -3, +2