Latgolys Radejis zinis (12.11.2007.)
Nu šudinis da 14.novembram Daugavpiļs universitātē nūtiks Latgolys kongress, kurā tiks sprīsts par Latgali kai kultūrviesturisku fenomenu, kai arī par pīrūbežys kultūru-Boltkrievejis, Latvejis, Lītovys i Krīvejis mijīdarbeibu kulturys procesūs. Latgolys kongresā pīsadaleis zynotnīki nu Boltkrīvejis, Izraelys, Krīvejis, Latvejis, Lītovys i Pūlejis. Tymā teika diskutāts par viesturis, etnologejis, volūdys, literaturys i muokslys vaicuojumim.
Šudiņ i reit, Daugavpils universitatē dorboisīs Letonikas 2 kongresa sekcija ”Latgolys sabīdreibys atteisteibys lūkūs: juridiskī, volūdys, poitikys, sociologiskī i viesturiskī aspekti”. Sekcejis dorba kuorteibā īkļauts 21 referats par vaicojumim, kas skar dažaidus Austrumlatvejis atteisteibis aspektus. Letonikas 2 kongresa sekceja Davgavpilī teik organizāta Latgolys apakšprogramā, kurys mierkis ir apsazynuot i apraksteit Latgolys kulturys modeli Latvejis i Eiropys kulturys kontekstā.
Šudiņ Preiļu nūvoda Aizkalnes pogostā nūteik atceris breids ”Myužeigā pīmiņā paliksim tautā, Latvejis varūni-Luočplieša ciļts”. Pi pīminis akmiņa svešatnī kritušajim i nūmūceitajim tiks īdagtys sveceitis vysu Latvejis breiveibys ceineitoju pīmiņai. Pasuokuma daleibnīki dūsīs kūpeigā gojīnī iz Bleidenes kopsātu pi Luočplieša Ordeņa kavalera Juoņa Butkeviča atdusys vītys, lai gūdynuotu karaveira pīmiņu.
Šudiņ Jiekabpils dūmē tiks prezentāta Krustpiļs salenis rekonstukcejis īcere. Ar paradzātū byuvju uzskatis materialu cylvāki var īpasazeit Jiekabpils dūmis foajē, leidz pat 26.novembram. Atsauksmis par byuvnīceibys īcerem i pylnveiduošonu var īsnīgt Jiekabpils dūmis Vīnys pīturys agenturā.
Šudiņ Kruoslovys rajona padūmis telpuos nūteik myužizgleiteibys vaicuojumim veļteits seminars. Tymā tiks diskutāts par myužizgleiteibys politikys tendencem Latvejā i Eiropys savīneibā, par Latgolys regiona myužizgleiteibys reiceibys planu, kai ari par ituos sistemys atteisteibu Kruoslovys rajonā.
Valsts apbolvuojumus – Atzineibys krystus – svineigā ceremonejā pasnīgs ito goda 16.novembrī. Caturtos škirys Atzineibys krystu pīškiers Jiekabpils piļsātys dūmis prīšksādātuojam Leonidam Salcevičam, Pīktuos škirys Atzineibys krystu pīškiers Bolvu rajona Ruguoju pogosta padūmis prīkšsādātuojai Ritai Kremerei i Bolvu muzykys školys direktoram Egonam Salmanim.
Šūreit iz Latvejis i Krīvejis rūbežys Terehovys rūbežkontrolis punktā gaideja 970 kravys automašinis, bet Grebnevys rūbežkontrolis punktā 260 auto. Terehovys rūbežkontrolis punktā kravys automašinu rynda ir sazamazynojuse par 30 automašinom, sovukuort Grebnevā tei ir pazalelinuojuse par 50 automašinom.
Šudiņ i da 1.decembram Gētes institutā Reigā byus apsaverama fotoizstode ”Ludza 2007”, kurā tiks demonstrāti lobuokī dorbi nu ituos vosorys Ludzā nūtykušuo 2 starptautiskuos fotografejis vosorys školys vysom pīcom tematiskom darbneicom. Studenti tūs ītvorā struoduoja pīcois tematiskejois darbneicois, kurys vadeja profesionali fotografi.
Zinis sagataveja: Guna Zvīdre
