Latgolys Radejis zinis (12.10.2007.)
Šudiņ i reit Rēzeknē nūteik tradicionāluo izstuode “Latgolys uzjiemiejs 2007”, kū reikoj Latvejis Tierdznīceibys i ryupnīceibys kamerys Rēzeknis nūdaļa sadarbeibā ar Rēzeknis dūmi. Itys pasuokums kotru rudini puļcej gon vītejūs uzjiemiejus, gon gostus nu citim nūvodim, pīduovojūt īspieju prezentēt jaunys precis i pakolpuojumus, sastapt jau esūšūs i īpazeit jaunus sadarbeibys partnerus.Šudiņ i reit Daugavpils rajona Skrudalīnys pogostā, Daugavpils Universitātis studeju i pietnīciskajā bāzē “Ilgys”, nūtiks 16. “Ilgu rudiņa seminārs. Semināra daleibnīki praktiskajuos nūdarbeibuos tiks apvuiceiti vuokt datus nu dažaidim biotopim, varēs pīsadaleit vidis sakūpšonys tolkā, dobys vāruošonys ekskursejā i nakts ekskursejā pa Ilgu dobys līguma teritoreju.
Daugavpils dūmis konferenču zālē šudiņ nūteik starptautiska konference “Oskars Stroks: Dzīve mūzikā”. Pasuokuma daleibnīki var nūsaskateit eisfimu par pazeistamuo komponista i muzyķa dzeivi i daiļradi , kai arī pīsadaleit Anisima Gimmerverta (Moskova) gruomotys “Oskar Strok – koroļ i poddannij” (Oskars Stroks – karalis un padotais) prezentācejā. Konferencis laikā klajā nuoks arī jauns temetiskais izdavums “Provinces almanahs – Hronos”.
Šudiņ Preiļu nūvoda Aizkalnis pamatškolys sareikuojuma zālē nūtiks seminārs “Jaunietis Jānis Pliekšāns – nākamais Rainis”. Semināru reikoj Rakstnīceibys, teātra i muzykys muzeja filiāle – Raiņa muzejs “Jasmuiža”. Pasuokuma programmys pasnīgšonys veids ir natradicionāls Raiņa izaugsmis i daiļradis atspūguļuošonā.
Šudiņ Comenius programmys Daugavpils Universitātis Ilgtspiejeigys izgleiteibys institūta projekta “Bārni kai pietnīki” septeņu valstu vadūšī profesori i školuotuoji gastei Daugavpils školuos. Daugavpilī gastej pyrmsškolys i suokumškolys speciālisti nu Anglejis, Beļgejis, Latvejis, Lītuvys, Norvēģejis, Turcejis i Zvīdrejis.
Šudiņ Daugavpilī turpynoj gasteit Francejis kultūrys centra direktors Žans Lui Lepretrs. Šudiņ Lepretrs pīsadaleis konferencē “Oskars Stroks: dzeive muzykā”, tiksīs ar Daugavpils dūmis Kultūrys nūdaļis darbinīkim, apmeklēs Vīneibys nomu, Daugavpils teātri, Daugavpils Nūvadpietnīceibys i muokslys muzeju i Arsenāla āku Daugavpils cītūksnī.
