Latgolys Radejis zinis (1.11.2007.)
Aizvakar tīseibsorgi Latgalē aizturiejuš 13 organizātys nūzīdzeigys grupys dalinīkus, starp kurim beja arī Zilupis nūvoda mers Oļegs Agafonovs, tai vakar informē Latvejis Televīzejis raidejums “Panorāma”. Aizturātū personu vydā, kas tīk turātys aizdūmuos par kontrobandu, kukuļuošonu i omotpersonu dīnesta stuovūkļa ļaunpruoteigu izmontuošonu, ir arī pīci muitys i vīns rūbežsardzis darbinīks. Vairuokuos vītuos Latgalē nūtykušys krateišonys, kuru laikā atrostys apmārom 800 tyukstužys dolāru (390 400 latu).
Turpmuok Ludzys piļsātys ģimnāzejis, Ludzys 2. vydsškolys i Ludzys muzykys pamatškolā tryuceigūs bārnu ādynuošonys moksa byus vīns lats dīnā. Itaidu lāmumu Ludzys dūme pījāmus, pamatojūtīs iz ādynuošonys pakalpuojuma snīdzieja mynātajuos izgleiteibys īstuodēs SIA “Raut V” īsnīgumu par školniku ādynuošonys moksys paaugstynuošonu. Īprīkš nu izgleiteibys īstuožu audziekņu vacuokim sajimtys vairuokys syudziebys par SIA “Raut V” ādynuošonys kvalitāti.
Pēc Latvejis viestnīceibys Turcejī īlyuguma, 4. novembrī latgaļu etnoroka grupa “Laimas Muzykanti” dūdās koncertceļojumā iz Turcejis golvyspiļsātu Ankaru, kur 5. novembrī dūs koncertu Latvejis viestnīceibā, kur nūtiks pījimšona par gūdu 89. Latvejis proklamiešonys godadīnai. 6. novembrī nūtiks Laimas Muzykantu koncerts Tyvūs Austrumu Tehniskijā universitatī. Pēc Stambulys apmekliejuma Laimas Muzykanti brauks iz sātu 8. novembrī..
Nu šudiņdīnys Jākubpilī pasalelynuojus mienešbiļešu cena piļsātys maršruta autobusūs. Pīaugušajim mienešbiļešu cena daaugus par divejim lati i turpmuok moksuos 10 i 11 latus, bet bārnim – par vīnu latu i tagad moksuos 5 latus. Bet nu 25. oktobra SIA “Jākubpiļa autobusu parks” par pīcim santimim paaugstynuoj autobusa biļešu cenys rajona maršrutūs. Sovukuort biļete da Reigys SIA “Jākubpiļa autobusu parks” autobusūs nu Ls 1,90 daaugs da Ls 2,25.
Šudiņ Daugavpils Universitātē turpynojās Latvejis 5. Karjerys dīnys “Ideja – Iespēja – Risinājums“. Karjerys dīnu mierķs ir veiduot dorba formu starp aktīvū jaunatni i uzjāmumu puorstuovjim, atbalsteit Latvejis dorba deviejus aizvīn gryušuokajā darbinīku atlasis procesā i runuot par veiksmeigai integrācejai dorba tiergā vajadzeigū izgleiteibu i prasmem.
Nu šudiņdīnys da 3. novembram Daugavpils Muzykys vydusškolā nūtiks X Starptautiskais akordeona mūzikas festivāls. Festivālā daleibu jims akardionisti i akardionistu ansambļi nu Latvejis, Lītuvys, Boltkrīvejis, Krīvejis, Vuocejis i Holandis. Kai festivāla vāžnuokī gosti Daugavpils skateituojus prīcēs populārais duets nu Krīvejis “Bajan Mix”.
