Latgolys Radeja: Sorkonuo Krysta akceja “Maizis Dīna”

Ar dažaidim pasuokumim Latvejā, tū vydā ari Rēzeknē i Daugavpilī, šudiņ (16.10.2007.) teik atzeimāta “Maizis Dīna”. Tymā Latvejis Sorkonuo Krysta Jaunatnes organizacejis daleibnīki planoj reikuot dažaidys aktivitatis, kai, pīmāram, zīduojumu vuokšonu, kuri piečuok tiks nūdūti konkretam mierkim, lai mozynuotum nabadzeibu myusu vaļstī. Latvejā aptuveni 20 % īdzeivuotuoju dzeivoj nabadzeibā. Jūs īnuokumi mienesī ir mozuoki par 60 latim. Zami īnuokumi bīži ir īmesls napītīkamam voi naveseleigam uzturam, kas atstuoj nūpītnys sakys iz cylvāka veseleibu.

Šudiņ Reigā, gastneicā “Gutenbergs” pl. 12.00 Lītovys investiceju kompaneja “E- enerģija”, kas ir SIA “Latgales enerģija” dybynuotuojs i kontrolpaketys turātuojs, reikoj presys konferenci, kurā masu medijim tiks snāgts uznāmuma vīdūklis par situaceju syltumapguodis nūdrūšynuošanā Rēzeknē.

Daugavpils universitātē (DU) suokuos i da 19. oktobram turpynuosīs Straptautiska studentu konference “Dzīvosim kopā, dzīvosim ilgtspējīgi”. Konferencē jaunīši nu Bolkrīvejis, Krīvejis, Latvejis, Lītovys apsprīss Zemis Hartys principus, viertēs ilgtspiejeigys izgleiteibys izpratnes pietejuma īspiejis itamuos vaļstīs. Piec konferencis paradzāts izdūt publikaceju, kurā tiks apkūpuoti konferences rezultati.

Paguojušajā dīnnaktī samozynuovušuos kravys automašynu ryndys iz Latvejis i Krīvejis rūbežys. Šūreit Terehovas rūbežkontroles punktā ryndā gaideja 960 kravys automašinys, kas ir par 20 muozuok nakai pyrmudīnis reitā. Grebņovā šūreit izbraukšonu nu vaļsts gaideja 500 auto, kas ir par 130 spākrotim muozuok nakai vakar.

Šudiņ pl. 13.00 Naturalizācijas pārvaldes (NP) Daugavpils reģionālās nodaļas Eksaminācijas sektorā nūtiks Informacejis dīna Latvejis pilsūneibys pretendentim. Informacejis dīnā pretendenti iz pilsūneibu tiks informāti par naturalizacejai napīcīšamajim dokumentim, kai ari par puorbaužu saturu i nūrisis kuorteibu. Apmaklātuojim izmēginuojuma kuorteibā tiks dūta īspieja kuortuot izmēginuojuma testu, kai ari sajimt Naturalizacejis Puorvaļdys darbinīku pārbaudys dorbūs pieļauto kļūdu snīgtū analīzi.

Nu 1. da 3. novembram Daugavpiļs Muzykys vydsškolā nūtiks 10.Starptautiskais akardeona muzykys festivals. Ītūgod skateitojim tiiks pīduovuota plaša programma. Jau pīktū reizi kūpā ar pīredzejušim izpildātuojim uzastuos ari jaunī akardeonisti – nūtiks akardeonistu konkurss. Daugavpiļē nūtīkušais akardeona muzykys festivals ir vīns nu vacuokajim itaida veida pasuokumim piļsātys kulturys dzeivē. Regulari reizi divejūs godūs tys nūteik jau 20 godus. Festivala muokslinīciskais vadeituojs vysus šūs godus ir Valērijs Hodukins.