LA-LA-DRA seši pasuokumi i diska prezentaceja
Berkeneļūs, projekta nūslāguma pasuokumā pīsadaleja: Arņs Slobožaņins, Edgars Kluss, Laura Bicāne, “Dyrbyni”, Raibīs Suņs, Arturs Uškāns i vīnu prozys gabaleni atsaļuove nūlaseit ari itūs ryndu autors.
Kai vysūs “La-La-Dra” pasuokumūs, ari itamā beja Aglyunys Maizes (paļdis Vijai Ancānei personeigi) saguoduoti lobumi: čajs, peirāgi, svaiga maizeite ar madu i, tai kai projekta nūslāgums, tod ari simboliska “šmakaucenis” luoseite.
Da Gunchi pastuosteja par jaunizdūtū Latgolys Radejis dzīsmu izlasi “[As ar čiuļim nadoncoju!]”, kas izdūta CD formatā (pīprosit lobuokajūs muzykys īrokstu veikalūs!)
Par gūdu pyrmuos itaida veida izlasis izdūšonai pasuokumā pīsadaleja ari “Rudiņs Steigys” i “Likteneigais pagrīzīņs iz Vainovu” (itī puiši pīsadaleja ari “La-La-Dra” pyrmajā koncertā Vabalī).
Latgaliskā atmosferā turpynovās puorrunys, dzīsmes i jaunu ideju apsprīsšona.
Kai jau stuosteits projekta “La-La-Dra” ītvorā nūtyka kūpā seši pasuokumi dažaiduos Daugavpiļs rajona vītuos. Projektu “La-La-Dra” atbaļsteja Eiropys Savīneiba – Eiropys lauksaimnisteibys virzeibys i garantiju fonds, „Vītejūs reiceibu atteisteiba (LEADER+ veida pasuokumi)”.
Projekta “Latgalīts Latgalīšam Draugs” golvonais aizdavums ir apvīnuot latgalīšus kūpeigai kuļturys dzeivis veiduošonais, ite juopīkreit Vladislava Luoča jau 1944.godā rakstajim vuordim: “…myusim, latgalim jōbyun lapnim uz tū, ka mes asam latvīšu tautas latgaļu calms, jo šys calms ir ar styprom un dziļom saknem. Mes asam izturiejuši godu symtus un naasam atrauti nu latvīšu tautas tikai tuopēc vīn, ka myusūs nav bejis mozvierteibas apziņas par sevi, sovu volūdu… Kas atsasoka nu godu symtu montōjuma, tys nav vairs sverams, jo tys pats ir aizguojs palovōs un kai palovas tod ari cyti tū vērtēs”.
