La-La-Dra projekts tyvojās nūslāgumam
Neicgalī ar muzykalim prīkšnasumim pīsadaleja Laura Bicāne, Edgars Kluss i ari vītejuos pamatškolys dzīduotuojis, kai kuļturys noma vadeituoja saceja – “laksteigolys”. Pī tam juo ari paruodeja, kai ir juodoncoj līnijdaņči izmontojūt latgalīšu muzyku. Prīcej, ka latgalīšu muzykai teik rosti jauni izmontuošonys veidi. 🙂
Beja kluotyn ari meitine vuordā Līga, kas drūsmeigi nūlaseja sovu dzeivūli. Atlykušuos literaruos pauzes aizpiļdeja itūs ryndu autors.
Vysi koncerta dalinīki sajēme par pīmini kruškenis, apdrukuotys ar La-La-Dra simboliku.
Nuokamī pasuokumi byus 7.dekabrī Višķu profesionalajā vydškolā (suokums pl.10:00) i Dvietis KN (suokums pl.16:00). A 9.dekabrī Berkeneļūs byus projekta pādejais pasuokums (pl.15:00), autobuss nu Daugavpiļs Universitatis atīs pl.14:00. Vysi laipni aicynuoti – seviški tī, kas da šam vēļ nabeja paspiejuš ni iz vīnu La-La-Dra koncertu.
Projekta ītvorā byus nūtykuši kūpā seši pasuokumi dažaiduos Daugavpiļs rajona vītuos. Projektu “La-La-Dra” atbolsta Eiropys Savīneiba – Eiropys lauksaimnisteibys virzeibys i garantiju fonds, „Vītejūs reiceibu atteisteiba (LEADER+ veida pasuokumi)”.
Projekta “Latgalīts Latgalīšam Draugs” golvonais aizdavums ir apvīnuot latgalīšus kūpeigai kuļturys dzeivis veiduošonais, ite juopīkreit Vladislava Luoča jau 1944.godā rakstajim vuordim: “…myusim, latgalim jōbyun lapnim uz tū, ka mes asam latvīšu tautas latgaļu calms, jo šys calms ir ar styprom un dziļom saknem. Mes asam izturiejuši godu symtus un naasam atrauti nu latvīšu tautas tikai tuopēc vīn, ka myusūs nav bejis mozvierteibas apziņas par sevi, sovu volūdu… Kas atsasoka nu godu symtu montōjuma, tys nav vairs sverams, jo tys pats ir aizguojs palovōs un kai palovas tod ari cyti tū vērtēs”.
Vairuok informacejis par projektu “Latgalīts Latgalīšam Draugs”