La-La-Dra 2
Leiksnys kuļturys nomu pīskandynova grupys “D-Light”, “Dabasu Durovys”, “Akmens Rieva” (nu Jēkabpils) i “Green Novice”. Iz reiz juosoka – itais pasuokums beja “smoguokais” La-La-Dra ītvorā – vysu vokoru skaneja rok i breižim pat metal stila muzyka. Deļ tam muzykantim pa vydu deļ klauseituoju atpyutynuošonys sovu prozu i ailis (dzeju) nūlaseja literats ar pseidonimu “Raibais Suņs” i Arturs Uškāns, kam eksperimentēt ar vuorda i myzykys leidzaskaneišonu itū reiz paleidzieja Armands Ozoliņš.
Vysi koncerta dalinīki sajēme par pīmini kruškenis, apdrukuotys ar La-La-Dra simboliku.
Nuokamais pasuokums byus 1.decembrī Neicgalis Tautys nomā, suokums pl.14:00. Vysi laipni aicynuoti – seviški tī, kas da šam vēļ nabeja paspiejs ni iz vīnu La-La-Dra koncertu.
Projekta ītvorā paradzāti kūpā seši pasuokumi dažaiduos Daugavpiļs rajona vītuos. Projektu “La-La-Dra” atbolsta Eiropys Savīneiba – Eiropys lauksaimnisteibys virzeibys i garantiju fonds, „Vītejūs reiceibu atteisteiba (LEADER+ veida pasuokumi)”.
Projekta “Latgalīts Latgalīšam Draugs” golvonais aizdavums ir apvīnuot latgalīšus kūpeigai kuļturys dzeivis veiduošonais, ite juopīkreit Vladislava Luoča jau 1944.godā rakstajim vuordim: “…myusim, latgalim jōbyun lapnim uz tū, ka mes asam latvīšu tautas latgaļu calms, jo šys calms ir ar styprom un dziļom saknem. Mes asam izturiejuši godu symtus un naasam atrauti nu latvīšu tautas tikai tuopēc vīn, ka myusūs nav bejis mozvierteibas apziņas par sevi, sovu volūdu… Kas atsasoka nu godu symtu montōjuma, tys nav vairs sverams, jo tys pats ir aizguojs palovōs un kai palovas tod ari cyti tū vērtēs”.
Vairuok informacejis par projektu “Latgalīts Latgalīšam Draugs”
